នេះជាការបំភ្លឺលើកដំបូងអំពីករណីគ្រោះថ្នាក់ ដែលបង្កឱ្យមានការរិះគន់យ៉ាងខ្លាំងលើបណ្តាញសង្គម អស់រយៈពេលជាច្រើនខែមកហើយ។ កិច្ចសម្ភាសន៍ស្រាយបំភ្លឺនេះ ត្រូវបានចាក់ផ្សាយនៅថ្ងៃចន្ទដើមសប្តាហ៍ ពោលគឺប៉ុន្មានថ្ងៃ បន្ទាប់ពីប្រជាជននាំគ្នាយកផ្កា ទៅដាក់នៅទីតាំងគ្រោះថ្នាក់ចរាចរណ៍ ដែលបានកើតឡើងកាលពីខែឧសភា ឆ្នាំ២០២៥។ អាជ្ញាធរនិយាយ​ថាមានជនឆ្លៀតឱកាស កេងចំណេញពីហេតុការណ៍នេះ។ មន្រ្តីប៉ូលិសជាន់ខ្ពស់ម្នាក់ បានស្រាយបំភ្លឺទៅកាន់ទូរទស្សន៍រដ្ឋ ជុំវិញករណីគ្រោះថ្នាក់ចរាចរណ៍ បណ្តាលឱ្យយុវតីម្នាក់ស្លាប់ នៅកណ្តាលទីក្រុងហាណូយ កាលពីឆ្នាំមុន ថាជនបង្កគឺជាអតីតអ្នកនយោបាយវៀតណាម ប៉ុន្តែត្រូវបានលើកលែងពីការចោទប្រកាន់ព្រហ្មទណ្ឌ ក្រោយរកឃើញថា វាជាកំហុសអចេតនា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី១៩ ខែសីហា ឆ្នាំ២០២៦។ អ្នកនាំពាក្យក្រសួងសន្តិសុខសាធារណៈវៀតណាម បញ្ជាក់ថា «កម្លាំងអរិភាព និងកម្លាំងប្រតិកិរិយា បានភ្ជាប់ដោយចេតនានូវហេតុការណ៍ ដាច់ដោយឡែកខាងលើ ជាមួយករណីផ្សេងៗទៀត ដើម្បីជះឥទ្ធិពល និងញុះញង់យុវជន ក៏ដូចជាសិស្ស និស្សិត ហើយបង្កឱ្យមានការរំខានដល់សណ្តាប់ធ្នាប់ និងសន្តិសុខសាធារណៈ»។ Reuters មិនអាចកំណត់បានថា តើអ្វីជាមូលហេតុដែលនាំឱ្យមានការកើនឡើងនៃសកម្មភាពយកផ្កា ទៅដាក់នៅកន្លែងកើតហេតុនាពេលថ្មីៗនេះទេ៕

ព័ត៌មានទាក់ទង