រាជធានីភ្នំពេញ៖លោកអំពាវនាវបែបនេះ នៅថ្ងៃទី២៤ ខែសីហា ឆ្នាំ២០២៦ ក្នុងសន្និសីទសារព័ត៌មានស្តីពីការរៀបចំមហោស្រពជាតិភាពយន្តខ្នាតខ្លីកម្ពុជា លើកទី៥ ដែលរៀបចំ ដោយនាយកដ្ឋានសិល្បៈភាពយន្តនិងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រ សិល្បៈ នៅរោងហ្វេប៊ល (Fable Cinema)។ លោក ឯក ប៊ុនថា អនុរដ្ឋលេខាធិការ តំណាងលោកស្រីរដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងអំពាវនាវដល់សប្បុរសជនទាំងអស់ ចូលរួមឧបត្ថម្ភគាំទ្រការរៀបចំមហោស្រពជាតិភាពយន្តខ្នាតខ្លីកម្ពុជា។ លោក ឯក ប៊ុនថា បានបញ្ជាក់យ៉ាងដូច្នេះថា «ក្នុងនាមក្រសួងវប្បធម៌និងវិចិត្រសិល្បៈ និងក្នុងនាមគណៈកម្មការ រៀបចំមហោស្រពជាតិភាពយន្តខ្នាតខ្លីកម្ពុជាលើទី៥ ឆ្នាំ២០២៦នេះ ខ្ញុំសូមអំពាវនាវដល់ ឯកឧត្តម លោកជំទាវ ឧកញ៉ា លោក លោកស្រី តំណាងអង្គការ សមាគម ក៏ដូចជាក្រុមហ៊ុន នានា មេត្តាចូលរួមឧបត្ថម្ភគាំទ្រដល់ដំណើរការរៀបចំមហោស្រពនេះ។ ការចូលរួមរបស់គ្រប់ ភាគី គឺជាកម្លាំងដ៏សំខាន់ក្នុងការជំរុញ លើកកម្ពស់ និងអភិវឌ្ឍវិស័យភាពយន្តកម្ពុជាឱ្យមាន ការរីកចម្រើនប្រកបដោយគុណភាព និងចីរភាព»។ លោកបានបន្តថា «ជាមួយគ្នានេះ ខ្ញុំក៏សូមអំពាវនាវ និងស្នើសុំដល់អ្នកសារព័ត៌មានជាតិ និងអន្តរជាតិទាំងអស់ មេត្តាចូលរួមផ្សព្វផ្សាយព័ត៌មានអំពីមហោស្រពជាតិភាពយន្តខ្នាតខ្លីកម្ពុជា លើកទី៥ ឱ្យបានទូលំទូលាយ ដើម្បីឱ្យសាធារណជន ជាពិសេសយុវជន និងអ្នកស្រឡាញ់វិស័យភាពយន្ត បានជ្រួតជ្រាបព័ត៌មាន និងចូលរួមក្នុងព្រឹត្តិការណ៍ដ៏មានសារៈសំខាន់នេះឱ្យបានច្រើនកុះករ»។ បើតាមលោក ឯក ប៊ុនថា មហោស្រពជាតិភាពយន្តខ្នាតខ្លីកម្ពុជាលើកទី៥ ក្រោមប្រធានបទ «ភាពយន្តខ្នាតខ្លី ជាជំហានឆ្ពោះទៅកាន់ភាពយន្តខ្នាតវែង» ដែលគ្រោងនឹងរៀបចំនាសប្តាហ៍ទី១ នាខែវិច្ឆិកា ឆ្នាំ២០២៦ខាងមុខនេះ គឺជាព្រឹត្តិការណ៍ដ៏មានសារសំខាន់ និងចាំបាច់ក្នុងការជំរុញលើកទឹកចិត្ត ដល់យុវជនដើម្បីបញ្ចេញគំនិតច្នៃប្រឌិត ចែករំលែកនូវព័ត៌មានដែលពួកគេមាន តាមរយៈអេក្រង់ ឬផ្ទាំងសំពត់ស និងជាជំហានដំបូងក្នុងការនាំពួកឱ្យក្លាយជាផលិតករភាពយន្ត។ មហោស្រព នេះ ក៏ជាវេទិកាដ៏មានតម្លៃសម្រាប់យុវផលិតករ ក្នុងការបង្ហាញ និងចែករំលែកស្នាដៃរបស់ខ្លួន ទៅកាន់សាធារណជន ព្រមទាំងជាជំហានដំបូងក្នុងការបណ្តុះបណ្តាល និងតម្រង់ទិសពួកគេ ឱ្យឈានទៅក្លាយជាផលិតករភាពយន្តអាជីពនាពេលអនាគតផងដែរ។ លោកបានបន្ថែមថា ចាប់តាំងពីការបង្កើតឡើងនៅឆ្នាំ២០១៦ មហោស្រពជាតិភាពយន្តខ្នាតខ្លីកម្ពុជា បានដើរតួនាទីយ៉ាងសំខាន់ក្នុងការបណ្តុះបណ្តាល និងបង្កើតធនធានមនុស្សជំនាន់ថ្មីប្រកប ដោយសមត្ថភាពទេពកោសល្យក្នុងវិស័យភាពយន្តសម្រាប់ពេលបច្ចុប្បន្ន និងអនាគត។ យុវជនទាំងអស់បានចូលរួមចំណែកយ៉ាងសកម្មក្នុងការបង្កើតស្នាដៃភាពយន្តថ្មីៗ ប្រកបដោយ គំនិតច្នៃប្រឌិត ដែលបង្កប់ទៅដោយអត្ថន័យខ្លឹមសារអប់រំ សីលធម៌ គុណធម៌ និងអត្តសញ្ញាណជាតិ ដែលសកម្មភាពទាំងនេះមិនត្រឹមតែបានជួយអភិឌ្ឍន៍ឧស្សាហកម្មភាពយន្ត កម្ពុជាប៉ុណ្ណោះទេ តែថែមទាំងបានចូលរួមចំណែកយ៉ាងសំខាន់ក្នុងការថែរក្សា ការពារវប្បធម៌ និងលើកតម្កើងវប្បធម៌ ប្រពៃណី និងទំនៀមទម្លាប់ដ៏ល្អផូរផង់របស់ជាតិយើងផងដែរ។ សូមជម្រាបថា នៅក្នុងមហោស្រពជាតិភាពយន្តខ្នាតខ្លីនេះ មានពានរង្វាន់ធំចំនួន ៤ ដែលក្នុងនោះរួមមាន៖ *ពានជ័យលាភីលេខ១ (Gold Award) ទទួលបានពានមាស អមដោយថវិកា *ពានជ័យលាភីលេខ២ (Silver Award) ទទួលបានពានប្រាក់ អមដោយថវិកា *ពានជ័យលាភីលេខ៣ (Bronze Award) ទទួលបានពានសំរិទ្ធ អមដោយថវិកា *ពានរង្វាន់របស់មេប្រយោគ(Special Jury Award) ទទួលបានពាន អមដោយថវិកា៕

ព័ត៌មានទាក់ទង