ការសម្រេចចិត្តនេះធ្វើឡើងស្របពេលដែលការប្រយុទ្ធគ្នារវាងអារ៉ាប៊ីសាអូឌីត ដែលជាប្រទេសនាំចេញប្រេងឆៅធំបំផុតលើពិភពលោក និងក្រុមហ៊ូទីដែលគាំទ្រដោយអ៊ីរ៉ង់ កំពុងមានសភាពក្តៅគគុក បន្ទាប់ពីក្រុមនេះបានរុលទៅកាន់ច្រកសមុទ្រ Bab el-Mandeb ដែលជាផ្លូវទឹកយុទ្ធសាស្ត្រនៅសមុទ្រក្រហម (Red Sea)។ ដំណឹងនៃការជម្លៀសនេះ បានធ្វើឱ្យទីផ្សារភាគហ៊ុនអារ៉ាប៊ីសាអូឌីតធ្លាក់ចុះ ២,៥ភាគរយ ខណៈតម្លៃប្រេងសកលបានហក់ឡើងដល់កម្រិតខ្ពស់បំផុតគិតចាប់តាំងពីខែឧសភា ដោយសារក្តីបារម្ភពីការរាំងស្ទះការផ្គត់ផ្គង់ប្រេង។ ក្រុមហ៊ុនប្រេងរដ្ឋអារ៉ាប៊ីសាអូឌីត Aramco បានបញ្ជាឱ្យបុគ្គលិកជម្លៀសចេញពីទីស្នាក់ការកណ្តាលរបស់ខ្លួននៅក្នុងទីក្រុង Dhahran និងប្តូរទៅធ្វើការពីចម្ងាយវិញ បន្ទាប់ពីមានការកើនឡើងនៃការវាយប្រហារពីក្រុមឧទ្ទាមហ៊ូទី (Houthis) នៅយេម៉ែន។ នេះគឺជាការជម្លៀសបុគ្គលិកលើកដំបូងបង្អស់ ចាប់តាំងពីសង្គ្រាមនៅអ៊ីរ៉ង់បានផ្ទុះឡើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters កាលពីថ្ងៃព្រហស្បតិ៍។ អ្នកនាំពាក្យយោធាក្រុមហ៊ូទី លោក យ៉ាហ្សា សារី (Yahya Saree) បានអះអាងថា ក្រុមរបស់ខ្លួនបានបើកការវាយប្រហារលើទីតាំងក្រុមហ៊ុន Aramco ក្នុងទីក្រុង Yanbu និងក្រសួងការពារជាតិនៅរដ្ឋធានីរីយ៉ាដ។ គួររំលឹកថា កាលពីដើមខែនេះ ក្រុមហ៊ូទីក៏ធ្លាប់បានវាយប្រហារទីស្នាក់ការកណ្តាលរបស់ Aramco ម្តងរួចមកហើយ ដែលបង្កឱ្យមានអគ្គិភ័យឆាបឆេះជាច្រើនជាន់។ ជាការឆ្លើយតប សម្ព័ន្ធមិត្តដឹកនាំដោយអារ៉ាប៊ីសាអូឌីត បានបញ្ជាក់ថា ខ្លួនបានស្ទាក់ចាប់ដ្រូន (Drone) នៅលើដែនអាកាសទីក្រុងរីយ៉ាដ និងទីក្រុង Medina ព្រមទាំងបានបើកការវាយប្រហារតាមអាកាសសងសឹកទៅលើទីតាំងបាញ់មីស៊ីលរបស់ក្រុមហ៊ូទីវិញផងដែរ។ ទន្ទឹមនឹងនេះ នៅឯទីក្រុងបាកដាត (Baghdad) រដ្ឋមន្ត្រីការបរទេសអ៊ីរ៉ង់ លោក អាប់បាស អារ៉ាក់ជី (Abbas Araqchi) បានប្រកាសថា សំណើរបស់អ៊ីរ៉ង់ក្នុងការបើកច្រកសមុទ្រហ័រមូស (Strait of Hormuz) ឡើងវិញក្នុងរយៈពេល ៧ថ្ងៃ នៅតែមានសុពលភាពដដែល ប្រសិនបើសហរដ្ឋអាមេរិកព្រមទទួលយកលក្ខខណ្ឌទាំង ៧ចំណុចរបស់ខ្លួន រួមមាន ការដកការបិទខ្ទប់កំពង់ផែ ការលើកលែងទណ្ឌកម្មប្រេង និងការបញ្ចប់អរិភាពនៅគ្រប់សមរភូមិក្នុងតំបន់។ ទោះជាយ៉ាងណា ចំណុចខ្វែងគំនិតដ៏ធំបំផុតគឺ ទីក្រុងវ៉ាស៊ីនតោន (Washington) ទាមទារឱ្យមានការដោះស្រាយបញ្ហាកម្មវិធីនុយក្លេអ៊ែររបស់អ៊ីរ៉ង់ជាមុនសិន ខណៈដែលទីក្រុងតេហេរ៉ង់ (Tehran) ចង់ឱ្យផ្តោតលើការបើកច្រកសមុទ្រហ័រមូសជាអាទិភាព៕

ព័ត៌មានទាក់ទង