វ៉ាក់សាំងដែលមានឈ្មោះថា intismeran autogene គឺមានលក្ខណៈខុសពីវ៉ាក់សាំងទូទៅ។ ជំនួសឱ្យការទប់ស្កាត់បង្ការជំងឺមហារីកតែម្តង វាត្រូវបានរចនាឡើង ដើម្បីជួយប្រព័ន្ធភាពស៊ាំរបស់អ្នកជំងឺ ឱ្យវាយប្រហារកោសិកាមហារីក បន្ទាប់ពីដុំសាច់ត្រូវបានវះកាត់យកចេញ។ ម៉្យាងវិញទៀត វ៉ាក់សាំងនេះរចនាឡើង សម្រាប់អ្នកជំងឺម្នាក់ៗជាពិសេស តាមរយៈការវិភាគលើការប្រែប្រួលនៃលំដាប់ហ្សែន ឬ DNA នៅក្នុងដុំសាច់របស់អ្នកជំងឺនីមួយៗដាច់ដោយឡែកពីគ្នា ពោលគឺមិនមែនវ៉ាក់សាំងដូចគ្នាតែមួយ ប្រើលើអ្នកជំងឺទាំងអស់នោះទេ។ វ៉ាក់សាំងនេះ ផ្អែកលើបច្ចេកវិទ្យា mRNA ហើយត្រូវចាក់រួមគ្នា ជាមួយនឹងវ៉ាក់សាំងមហារីក Keytruda របស់ក្រុមហ៊ុន Merck។ នាពេលថ្មីៗនេះ ក្រុមហ៊ុនវេជ្ជសាស្រ្តរបស់សហរដ្ឋអាមេរិក Moderna និង Merck បានរាយការណ៍ពី​ការសម្រេចបានលទ្ធផលជោគជ័យ ក្នុងកិច្ចប្រឹងប្រែងធ្វើតេស្តវ៉ាក់សាំងប្រភេទថ្មីមួយ សម្រាប់ប្រយុទ្ធប្រឆាំងជំងឺមហារីកដ៏កាចសាហាវ។ នេះបើតាមការចេញផ្សាយដោយ សារព័ត៌មាន Newsweek។ បើតាមក្រុមហ៊ុន Moderna និង Merck ការសាកល្បងព្យាបាលដំណាក់កាលទី៣ ក្នុងចំណោមអ្នកជំងឺមហារីកស្បែក ដែលមានហានិភ័យខ្ពស់ និងត្រូវបានវះយកដុំសាច់មហារីកចេញ វិធីព្យាបាលខាងលើ សម្រេចបានគោលដៅសំខាន់របស់ខ្លួន នោះគឺអ្នកជំងឺដែលបានទទួលការព្យាបាលនេះហើយ មិនកើតជំងឺមហារីកឡើងវិញឡើយ សម្រាប់រយៈពេលយូរជាងធម្មតា។ លើសពីនេះ ជំងឺមហារីកក៏ត្រូវបានរារាំងមិនឱ្យរាលដាល ទៅដល់ផ្នែកដទៃទៀតនៃរាងកាយ សម្រាប់រយៈពេលយូរជាងធម្មតា ផងដែរ។ ក្រុមហ៊ុនទាំងពីរ បានបញ្ជាក់ថា នេះគឺជាលទ្ធផលវិជ្ជមាននៃការធ្វើតេស្តដំណាក់កាលទី៣ដំបូងគេបង្អស់ សម្រាប់វ៉ាក់សាំងប្រភេទ neoantigen និងផ្តោតជាពិសេស សម្រាប់អ្នកជំងឺម្នាក់ៗដាច់ដោយឡែកពីគ្នា ហើយផ្អែកលើបច្ចេកវិទ្យា mRNA។ ទោះជាយ៉ាងណាក៏ដោយ វ៉ាក់សាំងនេះ កំពុងស្ថិតក្នុងការពិសោធធ្វើតេស្តនៅឡើយ ហើយរហូតមកដល់ពេលនេះ បានបង្ហាញលទ្ធផលវិជ្ជមានដំណាក់កាលទី៣ តែចំពោះជំងឺមហារីកស្បែកប៉ុណ្ណោះ។ អ្នកស្រាវជ្រាវ កំពុងតែបន្តសិក្សាពីប្រសិទ្ធភាពរបស់វា ក្នុងការប្រយុទ្ធប្រឆាំងជំងឺមហារីកផ្សេងទៀត រួមមានមហារីកសួត មហារីកប្លោកនោម និងមហារីកតម្រងនោម ជាដើម៕

ព័ត៌មានទាក់ទង