ខេត្តកំពត៖ជុំវិញនៃអង្គហេតុខាងលើ លោក ម៉ៅ ប៊ុនលី ក៏បានដាក់ពាក្យបណ្ដឹងប្ដឹងលោក សេង សិរីបុត្រ ទៅកាន់អយ្យការអមសាលាដំបូងខេត្តកំពត បើយោងតាមពាក្យបណ្តឹង ចុះថ្ងៃទី១២ ខែមករា ឆ្នាំ២០២៦ ដែលមានសំណុំរឿង ព្រហ្មទណ្ឌលេខ ១៨២ ចុះថ្ងៃទី០២ ខែមីនា ឆ្នាំ២០២៦។ ប៉ុន្តែត្រូវបានលោក ហាក់ ហ៊ាន់ ព្រះរាជអាជ្ញារង បានចេញនូវដីកាសម្រេចតម្កល់រឿងទុកឥតចាត់ការ លេខ២២៥ ក្នុងសំណុំរឿងព្រហ្មទណ្ឌលេខ ១៨២ ចុះថ្ងៃ ទី០២ ខែមីនា ឆ្នាំ២០២៦ ទៅវិញ។ លោក ម៉ៅ ប៊ុនលី ជាប្រជាពលរដ្ឋម្នាក់រស់នៅខេត្តកំពត បានអះអាងថា ខ្លួនទទួលរងនូវអំពើ អយុត្តិធម៌ ដោយសារតែលោក សេង សិរីបុត្រ ជាអភិបាលរងខេត្តកំពត បានខ្ចីលុយរបស់ខ្លួនចំនួន ៦ម៉ឺនដុល្លារ មិនព្រមសង ដោយធ្វើការកៃបំបាត់ និងចេញមូលប្បទានបត្រគ្មានសាច់ប្រាក់ (កុងធនាគារបានបិទ) និងបំផ្លើសអង្គហេតុ ហើយថែមទាំងប្តឹងគាត់ទៅស្ថាប័នអយ្យការអមសាលាដំបូងខេត្តកំពតទៀត។ ដោយមិនអាចទទួលយកបាននូវភាពអយុត្តិធម៌នេះ លោក ម៉ៅ ប៊ុនលី បានពាក្យបណ្តឹងទៅកាន់លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ដើម្បីស្វែងរកយុត្តិធម៌ពាក់ព័ន្ធនឹងករណីបុគ្គលឈ្មោះ សេង សិរីបុត្រ ដែលមានតួនាទីជាអភិបាលរងខេត្តកំពត ខ្ចីលុយ ៦ម៉ឺនដុល្លារ មិនព្រមសង។ តាមរយៈពាក្យបណ្តឹងដ៏វែងអន្លាយមានរហូតដល់ចំនួន ២៤ទំព័រ របស់លោក ម៉ៅ ប៊ុនលី បានរៀបរាប់យ៉ាងលម្អិតពីរឿងរ៉ាវ និងបង្ហាញភស្តុតាងយ៉ាងច្រើន ដែលខ្លួនបានប្រគល់លុយជូនលោកអភិបាលរងខេត្ត សេង សិរីបុត្រ ជាមួយលិខិតខ្ចីប្រាក់ដោយផ្ទេរកម្មសិទ្ធិ, ប្រតិបត្តិការផ្ទេរប្រាក់ និងសែកស្អុយផងដែរ៕

ព័ត៌មានទាក់ទង