រដ្ឋាភិបាលឥណ្ឌា បានចេញច្បាប់ធ្វើវិសោធនកម្ម ចំពោះច្បាប់វិភាគទានបរទេស (បទប្បញ្ញត្តិ) ហៅកាត់ FCRA ក្នុងសប្តាហ៍នេះ។ឥណ្ឌា បានរឹតបន្តឹងច្បាប់ សម្រាប់អង្គការមិនមែនរដ្ឋាភិបាល ដែលទទួលមូលនិធិពីបរទេស ដោយតម្រូវឱ្យពួកគេបញ្ជាក់ អំពីរបៀបដែលមូលនិធិនឹងត្រូវបានប្រើប្រាស់ ទីតាំងដែលពួកគេនឹងប្រតិបត្តិការ ក៏ដូចជាគោរពតាមតម្រូវការរាយការណ៍យ៉ាងតឹងរ៉ឹង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី២៤ ខែមិថុនា ឆ្នាំ២០២៦។ ក្រុមដែលដាក់ពាក្យសុំចុះឈ្មោះ FCRA ឥឡូវនេះ ត្រូវតែបញ្ជាក់ពីសកម្មភាពរបស់ពួកគេ តាមលិខិតដែលបានអនុម័ត។ ទាំងនោះរួមមាន ការអប់រំ សុខភាព វប្បធម៌ សាសនា ការអភិវឌ្ឍផ្នែកសេដ្ឋកិច្ច និងសុខុមាលភាពសង្គម ហើយប្រកាសទីតាំងសម្រាប់ធ្វើការ។ ពួកគេក៏នឹងត្រូវបញ្ចេញព័ត៌មានលម្អិតបន្ថែម នៅលើគេហទំព័រ និងគណនីប្រព័ន្ធផ្សព្វផ្សាយសង្គមផងដែរ។ តាមច្បាប់ថ្មី ឯកសារប្រចាំឆ្នាំរបស់អង្គការ ត្រូវតែរួមបញ្ចូលរបាយការណ៍ពង្រីកសកម្មភាព និងគម្រោងលម្អិត ពាក់ព័ន្ធការចំណាយមូលនិធិបរទេស។ សម្រាប់អង្គការដែលមានជនបរទេស កាន់តួនាទីសំខាន់ ជាទូទៅគ្មានសិទ្ធិទទួលបានមូលនិធិពីបរទេសឡើយ៕

ព័ត៌មានទាក់ទង