ខេត្តស្វាយរៀង៖ការលើកឡើងបែបនេះ ក្នុងឱកាសដែលលោកបណ្ឌិតចុះជួបសំណេះសំណាលជាមួយអាជីវករលក់ដូរនៅភូមិស្វាយកន្រ្តែ ឃុំសំយោង ស្រុកកំពង់រោទ៌ ខេត្តស្វាយរៀង កាលពីព្រឹកថ្ងៃទី២៥ ខែតុលា ឆ្នាំ២០២៦។លោកបណ្ឌិត សម តារា តំណាងរាស្ត្រមណ្ឌលស្វាយរៀង បានសង្កត់ធ្ងន់ថា ពេលវេលាគឺជាការពិតដ៏សំខាន់ដែលមនុស្សគ្រប់រូបមានដូចគ្នា ហើយវាតែងតែរំកិលទៅមុខជានិច្ច។ លោកបណ្ឌិតបានបន្តថា ការប្រើប្រាស់ពេលវេលាប្រកបដោយប្រយោជន៍ គឺសំដៅដល់ការសម្រេចចិត្តប្រកបដោយគោលបំណងច្បាស់លាស់ និងមានការទទួលខុសត្រូវ ដើម្បីជំរុញការអភិវឌ្ឍចំណេះដឹង លើកកម្ពស់សុខភាព និងប្រកាន់ខ្ជាប់ក្រមសីលធម៌។ លោកបានលើកឧទាហរណ៍ជាក់ស្តែងពីករណីក្មួយ ប៊ិច សាផេន និងភរិយា ហែម សុភាព ដែលទោះជារៀនបានតិចតួច ក៏ពួកគាត់បានប្រើប្រាស់ពេលវេលាប្រកបដោយប្រយោជន៍។ ពីអ្នកធ្វើស្រែ និងកម្មការិនីរោងចក្រ ពួកគាត់បានចាប់ផ្តើមអាជីវកម្មលក់គ្រឿងភេសជ្ជៈបោះដុំតាំងពីតិចតួច រហូតរីកចម្រើនអាចលក់ដូរបានពី ៤ ទៅ ៥ លានរៀលក្នុងមួយថ្ងៃ។ លោកបណ្ឌិតបានគូសបញ្ជាក់ថា ការតស៊ូ និងការប្រើប្រាស់ពេលវេលាប្រកបដោយភាពឈ្លាសវៃរបស់ក្មួយទាំងពីរ បានកែប្រែជីវភាពរស់នៅរបស់ពួកគាត់ឲ្យកាន់តែប្រសើរឡើង។ នេះបង្ហាញថា គុណភាពជីវិតរបស់យើងពិតជាអាស្រ័យលើរបៀបដែលយើងប្រើប្រាស់ពេលវេលាដែលមានក្នុងជីវិតជាក់ស្តែងរបស់យើងដោយឈ្លាសវៃ។ ការចាប់ផ្តើមប្រើប្រាស់ពេលវេលាជាប្រយោជន៍សម្រាប់ជីវិតយើង និងជាតិយើងនៅថ្ងៃនេះ គឺប្រសើរជាងចំណាយពេលវេលាស្អែកសោកស្តាយចំពោះអ្វីដែលយើងមិនបានធ្វើកាលពីម្សិលមិញ៕

ព័ត៌មានទាក់ទង