តាមរដ្ឋបាលឧតុនិយមមជ្ឈិមតៃវ៉ាន់ (CWA) ព្យុះ Champi ដែលធ្លាប់ជាកំពូលព្យុះទីហ្វុងដ៏ខ្លាំងបំផុតមួយនៅមហាសមុទ្រប៉ាស៊ីហ្វិកក្នុងឆ្នាំនេះ កំពុងស្ថិតនៅចម្ងាយប្រមាណ ១៧០គីឡូម៉ែត្រភាគខាងកើតកោះតៃវ៉ាន់ ដោយមានល្បឿនខ្យល់ជិតផ្ចិតព្យុះរហូតដល់ ១៩១គីឡូម៉ែត្រក្នុងមួយម៉ោង។ ក្រុមអ្នកឧតុនិយមព្យាករថា ព្យុះនេះនឹងឆ្លងកាត់ក្បែរភាគឦសានកោះតៃវ៉ាន់នៅចុងថ្ងៃសុក្រនេះ មុនបត់ទៅទិសខាងជើងឆ្ពោះទៅឆ្នេរសមុទ្រចិន និងបន្តទៅភាគខាងត្បូងប្រទេសជប៉ុន ប៉ុន្តែវាក៏អាចបោកបក់ចូលដីគោកតៃវ៉ាន់ផងដែរ ប្រសិនបើទិសដៅព្យុះរេចុះឡើង ឬថមថយល្បឿន ដែលនឹងធ្វើឱ្យតំបន់ភ្នំភាគខាងជើងជុំវិញទីក្រុងតៃប៉ិ ទទួលរងទឹកភ្លៀងជិត ១ម៉ែត្រ។ ដែនកោះតៃវ៉ាន់ស្ទើរតែទាំងមូលបានផ្អាកដំណើរការនៅថ្ងៃសុក្រនេះ ដោយលុបចោលជើងហោះហើរជិត ១,០០០ជើង ខណៈព្យុះទីហ្វុង ចំប៉ី (Champi) បាននាំមកនូវខ្យល់បក់បោកខ្លាំង និងភ្លៀងធ្លាក់យ៉ាងគំហុក ហើយអាចនឹងបោកបក់ចូលដីគោកនៃកោះនេះដោយផ្ទាល់ ទោះបីជាកម្លាំងព្យុះបានថមថយចុះខ្លះក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៣ ខែតុលា ឆ្នាំ២០២៦។ គួរបញ្ជាក់ថា ឥទ្ធិពលខ្យល់កន្ត្រាក់ និងភ្លៀងធ្លាក់ខ្លាំងពីព្យុះនេះ បានបណ្តាលឱ្យមនុស្សម្នាក់ស្លាប់ និង ១៦៣នាក់រងរបួស ព្រមទាំងបង្ខំឱ្យអាជ្ញាធរជម្លៀសពលរដ្ឋ ២,៦៣៩នាក់ចេញពីតំបន់ភ្នំ និងត្រៀមទូកពោង ព្រមទាំងរថយន្តសង្គ្រោះដែលបើកបរបានទាំងលើទឹកនិងលើគោក នៅតាមតំបន់ឆ្នេរភាគខាងជើង។ ទន្ទឹមគ្នានេះ ក្រុមហ៊ុនអគ្គិសនី Taipower ក៏បានតភ្ជាប់ចរន្តអគ្គិសនីឡើងវិញស្ទើរទាំងស្រុង ក្រោយលំនៅឋានជាង ៧៧,០០០ខ្នងបានដាច់ភ្លើង ខណៈក្រុមហ៊ុនផលិតបន្ទះឈីបយក្ស TSMC បានអះអាងថាចង្វាក់ផលិតកម្មរបស់ខ្លួននៅតែដំណើរការជាធម្មតា៕

ព័ត៌មានទាក់ទង