ផ្អែកតាមឯកសារប្រកាសហិរញ្ញវត្ថុ បុគ្គលិកសេតវិមានពីររូបទៀតដែលទទួលបានប្រាក់កាដូប្រហាក់ប្រហែលគ្នានេះដែរ រួមមានលោកស្រី Margo Martin និងលោកស្រី Chamberlain Harris ដោយពួកគេបានបញ្ជាក់ថា ប្រាក់នោះគឺជា «កាដូប្រាក់សុទ្ធក្នុងឱកាសបុណ្យទាន» (Cash Gift for Holidays)។ សារព័ត៌មានអាមេរិក The Washington Post បានរាយការណ៍កាលពីថ្ងៃអង្គារកន្លងទៅនេះថា ប្រធានាធិបតីសហរដ្ឋអាមេរិក លោក ដូណាល់ ត្រាំ បានផ្តល់កាដូជាប្រាក់សុទ្ធចំនួន ៤៥,០០០ដុល្លារអាមេរិក ដល់ជំនួយការប្រតិបត្តិផ្ទាល់របស់លោក គឺលោកស្រី Natalie Harp ព្រមទាំងបុគ្គលិកសេតវិមានពីររូបផ្សេងទៀត។ នេះបើតាមការដកស្រង់ចេញផ្សាយនៅថ្ងៃពុធ ទី៩ ខែកញ្ញា ឆ្នាំ២០២៦។ លោកស្រី Natalie Harp ត្រូវបានគេដឹងថាជាជំនួយការដ៏ជិតស្និទ្ធបំផុតរបស់លោក ត្រាំ ដែលតែងតែនៅក្បែររូបលោកជានិច្ចនៅក្នុងអាណត្តិទីពីរនេះ ដោយមានភារកិច្ចជួយវាយអត្ថបទបង្ហោះលើបណ្តាញសង្គម និងបោះពុម្ពព័ត៌មានផ្សេងៗឱ្យលោកអាន រហូតដល់ត្រូវបានគេប្រសិទ្ធនាមថាជា «មនុស្សម៉ាស៊ីនព្រីន» (Human Printer)។ បច្ចុប្បន្ន លោកស្រីទទួលបានប្រាក់បៀវត្សរ៍ប្រចាំឆ្នាំចំនួន ១៥០,០០០ដុល្លារ ក្នុងតួនាទីជាជំនួយការពិសេស និងជាជំនួយការប្រតិបត្តិរបស់ប្រធានាធិបតី។ គួរបញ្ជាក់ថា អ្នកនាំពាក្យសេតវិមានបានចេញមុខការពារការផ្តល់កាដូនេះ ដោយលើកឡើងថា នេះគឺជា «ទម្លាប់ជាយូរយារណាស់មកហើយរបស់លោក ត្រាំ ក្នុងការផ្តល់កាដូថ្ងៃបុណ្យណូអែលដល់មនុស្សជុំវិញខ្លួន រួមទាំងបុគ្គលិក និងក្រុមជំនួយការផងដែរ» ហើយកាដូទាំងនេះមិនជាប់ពាក់ព័ន្ធនឹងកាតព្វកិច្ចការងារផ្លូវការរបស់ពួកគេនោះឡើយ ដែលធ្វើឱ្យទង្វើនេះគឺស្របច្បាប់ និងអនុលោមតាមក្រមសីលធម៌យ៉ាងពេញលេញ៕

ព័ត៌មានទាក់ទង