រាជធានីភ្នំពេញ៖ សម្ដេចមហាបវរធិបតី ហ៊ុន ម៉ាណែត បានឱ្យដឹងថា ក្នុងរយៈពេលជាង២ឆ្នាំមកនេះ រាជរដ្ឋាភិបាលបានជួបនូវវិញ្ញាសារ ចំនួន៣ រួមមាន៖ ១៖ បញ្ហាសង្គ្រាមឈ្លានពាន ទី២៖ ឧក្រិដ្ឋកម្មឆ្លងដែនសម័យថ្មី (Online Scams) និងទី៣៖ បញ្ហាសេដ្ឋកិច្ច។ សម្ដេចមហាបរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា បច្ចុប្បន្ននេះ កាសែតបរទេសភាគច្រើនលើសលប់ បានទទួលស្គាល់ការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Onilne Scams)។ ដោយក្នុង​រយៈពេល ​៥​ខែ​មក​នេះ​ ​កម្ពុជា​បាន​បង្ហាញ​ពិភព​លោក​ ពី​ការ​ប្ដេជ្ញា​ចិត្ត​របស់​ខ្លួន​ប្រឆាំង​ឧក្រិដ្ឋកម្ម​ឆបោក​អនឡាញ ហើយ​កាសែត​ក្នុង​ពិភពលោក​ ជា​បន្តបន្ទាប់​បាន​ចេញ​មក​ទទួល​ស្គាល់​នូវ​យុទ្ធនាការ​ក្តៅរបស់កម្ពុជា។ ការថ្លែងបែបនេះ របស់សម្ដេចមហាបវរធិបតី ហ៊ុន ម៉ាណែត បានធ្វើឡើងនៅព្រឹកថ្ងៃទី២៧ ខែមិថុនា ឆ្នាំ២០២៦នេះ ក្នុងឱកាសសម្តេចបានអញ្ជើញជាអធិបតីក្នុងពិធីជួបសំណេះសំណាល ជាមួយមហាគ្រួសារសហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរសាទរទិវាជាតិសហគ្រាសធុនមីក្រូ តូច និងមធ្យម របស់សមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា។ សម្តេចបវរធិបតី ហ៊ុន ម៉ាណែត​ ក៏បានលើកឡើងថា បញ្ហា Online Scams វាបានប៉ះពាល់ដល់សេដ្ឋកិច្ចប្រផេះមួយចំនួនដែលមានការពាក់ព័ន្ធ។ ក៏ប៉ុន្តែកម្ពុជា គ្មានជម្រើសដើម្បីសម្អាតកេរ្តិ៍ឈ្មោះកម្ពុជាយើង។ យើងមិនត្រូវទុកឱ្យជនបរទេសចោទជាសំណួរថា តើទៅកម្ពុជា មានសុវត្ថិភាព ឬអត់ ទៅគេចាប់ជម្រិត ឬអត់? ថ្នាក់ដឹកនាំរបស់កម្ពុជា បានខិតខំប្រឹងប្រែងបិទបញ្ចប់សង្គ្រាមស៉ីវិលតាំងពីឆ្នាំ១៩៩៨ ដោយបានកសាងប្រទេសមានសុខសន្តិភាព មានសុវត្ថិភាព និងការអភិវឌ្ឍរបស់ដល់បច្ចុបន្ននេះ។ សម្តេចបវរធិបតី ហ៊ុន ម៉ាណែត បានបន្តថា តាមរយៈសុខសន្តិភាព ស្ថិរភាពនយោបាយពេញលេញ ដែលបានបង្កលក្ខណៈងាយស្រួលដល់ក្រុមអ្នកវិនិយោគិន បរទេសមកបណ្តាក់ទុនរកស៉ីនៅកម្ពុជា ពោលគឺរាជរដ្ឋាភិបាលកម្ពុជា​ បានប្រើប្រាស់ពេលវេលាយ៉ាងយូរ ដើម្បីកែប្រែពីប្រទេសធ្លាក់មានសង្គ្រាម ឱ្យក្លាយជាប្រទេសមានសុខសន្តិភាព។ ជាមួយគ្នានេះដែរ សម្ដេចបរធិបតី ហ៊ុន ម៉ាណែត សោកស្ដាយដែលបរទេសមើលឃើញកេរ្ដិ៍ឈ្មោះមិនល្អរបស់កម្ពុជា ដោយចោទសួរថា «តើខ្ញុំទៅស្រុកខ្មែរសុវត្ថិភាពអត់ មានគេចាប់ជម្រិត ឬអត់?» ដែលនេះជាអ្វីដែលត្រូវរួមគ្នាស្ដារកេរ្ដិ៍ឈ្មោះកម្ពុជាឡើងវិញ នៅលើឆាកអន្ដរជាតិ។ សម្តេចបវរធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «ក្នុងរយៈពេលប៉ុន្មានខែនេះ នៃយុទ្ធនាការរបស់យើង [...] ឥឡូវនេះមើលកាសែត ៤ ឬ៥ខែមុន ឱ្យតែនិយាយរឿង Online Scams គេចោទកម្ពុជា ជាប្រទេសនៃការប្រមូលផ្តុំ និងជាប្រទេសរស់សុខស្រួលបណ្តុំ Scams ឥឡូវកាសែតភាគច្រើនលើសលប់ទាំងអស់ បានចេញមកទទួលស្គាល់ សរសេរថា កម្ពុជាបានកម្ទេចសម្បុក Scams ហើយឧក្រិដ្ឋជនបានរត់ទៅប្រទេសផ្សេង»។ សម្តេចបវរធិបតី ហ៊ុន ម៉ាណែត បានគូសបញ្ជាក់ថា តាមរយៈព័ត៌មានពិតចេញពីកម្ពុជា នៅលើទំព័រកាសែតនេះហើយ គឺបានផ្តល់ភាពយុត្តិធម៌ជូនប្រទេសកម្ពុជា ខណៈបណ្តាប្រទេសនានានៅលើពិភពលោក ក៏ចាប់ផ្តើមចេញមកទទួលការពិតថាបទល្មើសឆបោកតាមប្រព័ន្ធបបច្ចេកវិទ្យានេះ មិនមែនកើតមានតែក្នុងប្រទេសកម្ពុជាមួយនោះទេ ប៉ុន្តែ ប្រទេសរបស់ពួកគេក៏មានដែរ។​ បើក្រឡេកទៅមើល ៥ខែមុនកម្ពុជា ជាប្រទេសដែលទទួលបន្ទុកតែម្នាក់ឯងលើបណ្តាញព័ត៌មានពាក់ព័ន្ធនឹងបទល្មើស Online Scams នេះ។ ទន្ទឹមនឹងនេះ សម្តេចបវរធិបតី ហ៊ុន ម៉ាណែត បានសង្កត់ធ្ងន់ថា ប្រសិនបើកម្ពុជា មិនចាត់វិធានការក្តៅនោះទេ សួរថាតើកម្ពុជា អាចស្តារមុខមាត់ និងកេរ្តិ៍ឈ្មោះលើឆាកអន្តរជាតិបានដែរ ឬទេ? ច្បាស់ណាស់មកដល់ម៉ោងនេះ កេរ្តិ៍ឈ្មោះរបស់កម្ពុជា ចំពោះក្រសែភ្នែកបរទេស នៅតែជាជម្រករបស់ក្រុមឧក្រិដ្ឋជន Online Scams តែម្នាក់ឯងដដែល។ សម្ដេចបវរធិបតី ហ៊ុន ម៉ាណែត បានបន្ថែមថា ដោយចាត់ទុកបញ្ហាបទល្មើស Online Scams គឺជាសង្គ្រាមការពារកេរ្ដិ៍ឈ្មោះកម្ពុជាលើឆាកអន្ដរជាតិ​ និងប្រកាសអំពីការប្ដេជ្ញាចិត្តបោសសម្អាតបទល្មើស Online Scams ឱ្យអស់ពីប្រទេសកម្ពុជា។ «យើង​ត្រូវ​ទទួល​ស្គាល់​ការ​ពិតពី​ឧក្រិដ្ឋកម្ម​ឆបោក​បោក​អនឡាញ​នៅកម្ពុជា​ ហើយ​ត្រូវ​ដោះស្រាយ​ដើម្បី​ការពារ​​កេរ្តិ៍​ឈ្មោះ និង​ផល​ប្រយោជន៍​ជាតិ​។ ក្នុង​រយៈពេល​៥​ខែ​មក​នេះ​ កម្ពុជា​បង្ហាញ​ពិភព​លោក​ថា​ខ្លួន​អាច​ធ្វើ​បាន»​។ នេះជាការលើកឡើងបន្ថែមរបស់សម្តេចបវរធិបតី ហ៊ុន ម៉ាណែត។ បន្ថែម​លើ​នេះ​ សម្ដេចបវរធិបតី ហ៊ុន ម៉ាណែត ​ក៏បាន​បញ្ជាក់​ថា ពេលនេះ​រាល់​ពេល​មាន​ជំនួប​ជាមួយ​ភ្ញៀវ​បរទេសមួយ​ចំនួន គឺពួកគាត់​​បាន​សរសើរ​កម្ពុជា ​ដោយសុំ​កម្ពុជា​ធ្វើជាគំរូ​ និង​សុំ​ឱ្យ​កម្ពុជា​ធ្វើ​ជា​ម្ចាស់​ផ្ទះ​នៃ​ការ​ធ្វើ​វេទិកាសន្និសីទ​ប្រឆាំង​ Online Scams នៅកម្ពុជា​ផងដែរ​៕

ព័ត៌មានទាក់ទង