រាជធានីភ្នំពេញ៖លោក ទេព នីថា អគ្គលេខាធិការ គ.ជ.ប បានធ្វើសេចក្តីរាយការណ៍អំពីដំណើរការរៀបចំការប្រឡងដែលបានប្រព្រឹត្តទៅកាលពីថ្ងៃទី១៤ និងទី១៦ ខែសីហា ឆ្នាំ២០២៦ នៅទូទាំង ២៥ រាជធានី ខេត្ត។ របាយការណ៍បានបង្ហាញថា បេក្ខជនសរុប ៨៩០ រូប (ស្រី ១៦៧ រូប) បានដាក់ពាក្យចូលរួមប្រឡង ហើយបេក្ខជនដែលមានវត្តមានក្នុងពេលប្រឡងមានចំនួន ៨៦១ រូប។ ក្រោយការកែសន្លឹកកិច្ចការ និងការបូកសរុបពិន្ទុដោយអនុគណៈកម្មការជំនាញ គ.ជ.ប បានរកឃើញថា បេក្ខជនសរុបចំនួន ៥៥៥ រូប បានប្រឡងជាប់ជាស្ថាពរ។ គណៈកម្មាធិការជាតិរៀបចំការបោះឆ្នោត (គ.ជ.ប) នៅព្រឹកថ្ងៃចន្ទ ទី២៤ ខែសីហា ឆ្នាំ២០២៦ បានបើកកិច្ចប្រជុំក្រោមអធិបតីភាពលោក ប្រាជ្ញ ចន្ទ ប្រធាន គ.ជ.ប ដើម្បីពិនិត្យ និងសម្រេចលើរបាយការណ៍ លទ្ធផលនៃការប្រឡងជ្រើសរើសមន្ត្រីជាប់កិច្ចសន្យារយៈពេលខ្លី។ មន្ត្រីទាំងនេះនឹងបម្រើការងារនៅតាមលេខាធិការដ្ឋានរាជធានី ខេត្តរៀបចំការបោះឆ្នោតទាំង ២៥ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦។ បេក្ខជនដែលបានប្រឡងជាប់នឹងត្រូវចូលបំពេញការងារតាមមុខតំណែងសំខាន់ៗមួយចំនួន រួមមាន៖ គ្រូបង្ហាត់ ជំនួយការរដ្ឋបាល ជំនួយការគណនេយ្យ ជំនួយការប្រតិបត្តិការ ជំនួយការសេវាកម្មច្បាប់ និងវិវាទកម្ម លេខាធិការ ការីកុំព្យូទ័រ និងអ្នកបើកបររថយន្ត។ មុខតំណែងទាំងនេះមានសារៈសំខាន់ណាស់ក្នុងការធានានូវដំណើរការរៀបចំការបោះឆ្នោតប្រកបដោយតម្លាភាព និងប្រសិទ្ធភាព។ អង្គប្រជុំ គ.ជ.ប បានពិភាក្សា និងសម្រេចឯកភាពទាំងស្រុងលើលទ្ធផលនៃការប្រឡងនេះ។ ក្នុងរបៀបវារៈផ្សេងៗលោក ប្រាជ្ញ ចន្ទ ក៏បានណែនាំបន្ថែមដល់អគ្គលេខាធិការ និងមន្ត្រីជំនាញ ត្រូវពន្យល់ភាគីពាក់ព័ន្ធឱ្យបានច្បាស់ លាស់អំពីកម្មវត្ថុនៃបណ្តឹងទាក់ទងនឹងបេក្ខជន និងនីតិវិធីនៃការដោះស្រាយពាក្យបណ្តឹង។ ជាមួយគ្នានេះ អគ្គលេខាធិការដ្ឋាន គ.ជ.ប នឹងរៀបចំកិច្ចប្រជុំពិគ្រោះយោបល់ជាមួយភាគីពាក់ព័ន្ធនៅថ្ងៃទី៣១ ខែសីហា ឆ្នាំ២០២៦ លើសេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៦ ឆ្នាំ២០២៧៕

ព័ត៌មានទាក់ទង