រាជធានីភ្នំពេញ៖សម្តេចនាយករដ្ឋមន្ត្រីកម្ពុជា ហ៊ុន ម៉ាណែត បានប្តេជ្ញាបង្កើនយុទ្ធនាការបង្ក្រាបទូទាំងប្រទេសប្រឆាំងនឹងបណ្តាញឆបោកតាមអនឡាញឆ្លងដែន ដែលកំពុងវិវត្ត និងមានភាពស្មុគស្មាញកាន់តែខ្លាំង។ សម្តេចបានលើកឡើងអំពីការប្តេជ្ញានេះក្នុងបទសម្ភាសន៍ផ្តាច់មុខជាមួយអ្នកសារព័ត៌មាន Avril Hong របស់ Bloomberg។ ខាងក្រោមជាសំណួរ-ចម្លើយបកប្រែក្រៅផ្លូវការចេញពីសម្ភាសន៍ពិសេសរវាង Bloomberg ជាមួយសម្តេចធិបតីនាយករដ្ឋមន្រ្តី៖ សំណួរ៖ កម្ពុជាសហការជាមួយសហរដ្ឋអាមេរិក ហើយក៏សហការជាមួយចិនលើបញ្ហាទាំងនេះផងដែរ។ តើលោកគិតថា សហរដ្ឋអាមេរិក និងចិនគួរតែសហការគ្នាឱ្យកាន់តែជិតស្និទ្ធជាងនេះដែរឬទេ? ដូចដែលលោកបានលើកឡើងថា នេះគឺជាបញ្ហាឆ្លងដែនដែល គ្មានប្រទេសណាមួយអាចដោះស្រាយតែម្នាក់ឯងបាន។ ចម្លើយ៖ បាទ ពិតជាដូច្នោះមែន។ ប្រធានាធិបតី Xi Jinping និងប្រធានាធិបតី Donald Trump ទើបតែបានជួបគ្នា។ រដ្ឋមន្ត្រីការបរទេស Marco Rubio ក៏កំពុងស្ថិតនៅទីក្រុងប៉េកាំង ជួបជាមួយរដ្ឋមន្ត្រីការបរទេស Wang Yi ដើម្បីរៀបចំដំណើរទស្សនកិច្ចរបស់ប្រធានាធិបតីទៅកាន់សហរដ្ឋអាមេរិក។ ទាំងនេះជាកិច្ចសហប្រតិបត្តិការទ្វេភាគីដែលប្រទេសទាំងពីរមានរួចហើយ។ នៅលើឆាកអន្តរជាតិ ក៏នឹងមានកិច្ចសហប្រតិបត្តិការពហុភាគី រួមទាំងរវាងសហរដ្ឋអាមេរិក និងចិនផងដែរ។ កម្ពុជានឹងធ្វើជាម្ចាស់ផ្ទះនៃសន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (International Conference on Combating Online Scams) ដែលនឹងមានការចូលរួមពីទាំងចិន និងសហរដ្ឋអាមេរិក។ ខ្ញុំបានអញ្ជើញគណៈប្រតិភូពី FBI ឱ្យចូលរួម ហើយលោកនាយក Kash Patel បាននិយាយថា លោកនឹងបញ្ជូនគណៈប្រតិភូជាន់ខ្ពស់មកចូលរួម។ ទាំងនេះគឺជាកិច្ចសហប្រតិបត្តិការដើម្បីដោះស្រាយបញ្ហារួម ដែលលើសពីបញ្ហាភូមិសាស្ត្រនយោបាយ។ វាគឺដើម្បីផលប្រយោជន៍របស់ប្រទេសទាំងអស់។ បណ្តាញឧក្រិដ្ឋកម្មអាចវាយប្រហារប្រទេសណាក៏បាន ដោយមិនគិតថាប្រទេសនោះមានការពាក់ព័ន្ធនយោបាយជាមួយពួកគេឬអត់។ អ្វីដែលពួកគេអាចកេងប្រវ័ញ្ចបាន ពួកគេនឹងកេងប្រវ័ញ្ច។ ពួកគេអាចវាយប្រហារទាំងសហរដ្ឋអាមេរិក និងចិនក្នុងពេលតែមួយ ដើម្បីរកប្រាក់ចំណេញពីការបោកប្រាស់ ឬជួញដូរគ្រឿងញៀន។ ដូច្នេះ ខ្ញុំយល់ថា កិច្ចសហប្រតិបត្តិការទាំងនេះមិនគួរត្រូវបានកំណត់ ឬក្លាយជាចំណាប់ខ្មាំងនៃបញ្ហាភូមិសាស្ត្រនយោបាយឡើយ។ ពេលខ្លះ យើងផ្តោតខ្លាំងពេកលើចំណុចអវិជ្ជមាន។ ប៉ុន្តែជារួមទំនាក់ទំនងវិជ្ជមានរវាងចិន និងសហរដ្ឋអាមេរិកនៅតែមាន ហើយមានកិច្ចសហប្រតិបត្តិការតាមរយៈបណ្តាញជាច្រើន។ សំណួរ៖ លោកបាននិយាយថា ក្រុមឧក្រិដ្ឋជនទាំងនេះកំពុងកាន់តែមានភាពស្មុគស្មាញ។ របាយការណ៍របស់អង្គការសហប្រជាជាតិបង្ហាញថា ពួកគេកំពុងដំណើរការដូចជាក្រុមហ៊ុនធំៗ ហើយនៅអាស៊ីអាគ្នេយ៍ ពួកគេកំពុងប្រើប្រាស់ដីសម្បទានក្នុងតំបន់សេដ្ឋកិច្ចពិសេស (SEZ) ដើម្បីប្រព្រឹត្តបទល្មើស។ កម្ពុជាមានតំបន់សេដ្ឋកិច្ចពិសេសជាច្រើន។ តើកម្ពុជាកំពុងធ្វើអ្វីខ្លះ ដើម្បីធានាថាតំបន់ទាំងនេះមិនត្រូវបានប្រើប្រាស់សម្រាប់សកម្មភាពឧក្រិដ្ឋកម្ម? ចម្លើយ៖ បាទ យើងបានរៀនពីបទពិសោធន៍របស់ប្រទេសដទៃ។ ខ្ញុំបានផ្តល់ការណែនាំយ៉ាងតឹងរ៉ឹងដល់អាជ្ញាធរសន្តិសុខ ឱ្យធ្វើការជាមួយអាជ្ញាធរមូលដ្ឋាន និងស្ថាប័នគ្រប់គ្រងតំបន់សេដ្ឋកិច្ចពិសេស ដើម្បីធានាថា មិនមាន SEZ ណាមួយត្រូវបានប្រើប្រាស់សម្រាប់លាក់បាំងសកម្មភាពឆបោកតាមប្រព័ន្ធបច្ចេកវិទ្យាឡើយ។​ ប្រសិនបើ SEZ ណាមួយត្រូវបានរកឃើញថាជាកន្លែងគាំទ្រឧក្រិដ្ឋកម្មបោកប្រាស់ នោះតំបន់នោះនឹងត្រូវទទួលខុសត្រូវតាមផ្លូវច្បាប់ ដូចជាអ្នកដទៃដែរ។ មកទល់ពេលនេះ យើងមិនទាន់មានភស្តុតាងបញ្ជាក់អំពីករណីបែបនេះនៅឡើយទេ។ យើងមានការប្រុងប្រយ័ត្នយ៉ាងខ្លាំងចំពោះបញ្ហានេះ។ តំបន់សេដ្ឋកិច្ចពិសេសជាច្រើននៅកម្ពុជា គឺជាវេទិកាសម្រាប់ទាក់ទាញការវិនិយោគផ្ទាល់ពីបរទេសក្នុងវិស័យផ្សេងៗ។ យើងសង្ឃឹមថា វានឹងបន្តរីកចម្រើន និងទាក់ទាញការវិនិយោគកាន់តែច្រើន។ យើងប្តេជ្ញាបន្តបង្ក្រាបបទល្មើសទាំងនេះ ហើយយើងបានឃើញលទ្ធផលរួចមកហើយ។ យើងនឹងធ្វើឱ្យកម្ពុជាក្លាយជាកន្លែងដែលមិនងាយស្រួល និងមិនមានតម្លៃសម្រាប់ក្រុមឆបោកតាមប្រព័ន្ធបច្ចេកវិទ្យាក្នុងការបន្តសកម្មភាព។ សំណួរ៖ ប្រទេសថៃបានផ្អាកការពិភាក្សាអំពីបញ្ហាព្រំដែន បន្ទាប់ពីកម្ពុជាបានស្នើឱ្យអង្គការសហប្រជាជាតិចូលរួមដោះស្រាយវិវាទដែនសមុទ្រ។ តើកំពុងមានកិច្ចខិតខំប្រឹងប្រែងអ្វីខ្លះ ដើម្បីចាប់ផ្តើមការចរចាព្រំដែនឡើងវិញ? ចម្លើយ៖ ខ្ញុំបានឮថា ថ្នាក់ដឹកនាំថៃ ជាពិសេសរដ្ឋមន្ត្រីការបរទេស បាននិយាយថា ដោយសារកម្ពុជាបានទៅប្រើយន្តការរបស់អង្គការសហប្រជាជាតិ នោះទ្វារសម្រាប់ការចរចាព្រំដែនគោកត្រូវបានបិទ។ ខ្ញុំចង់និយាយថា ការលើកឡើងនេះមិនសូវត្រឹមត្រូវ ហើយក៏មិនសូវយុត្តិធម៌ដែរ ដោយសារហេតុផលពីរ។ ទីមួយ៖ មូលហេតុដែលយើងទៅប្រើយន្តការផ្សះផ្សាជាកាតព្វកិច្ចរបស់អង្គការសហប្រជាជាតិ គឺដោយសារប្រទេសថៃបានសម្រេចលុបចោលអនុស្សរណៈយោគយល់ (MOU) ឆ្នាំ២០០១ ដែលជាកិច្ចព្រមព្រៀងទ្វេភាគីតែមួយគត់រវាងកម្ពុជា និងថៃស្តីពីដែនសមុទ្រ។ អស់រយៈពេលប្រហែល១៥ឆ្នាំ រដ្ឋាភិបាលថៃជាច្រើនជំនាន់ និងកម្ពុជាបានខិតខំធ្វើការលើមូលដ្ឋាននៃ MOU នេះ ដើម្បីស្វែងរកដំណោះស្រាយ រួមទាំងការអភិវឌ្ឍរួម។ ក្នុងអំឡុងពេលខ្ញុំកាន់តំណែង យើងក៏បានធ្វើការជាមួយអតីតនាយករដ្ឋមន្ត្រីថៃពីររូបផងដែរ។ ប៉ុន្តែទោះបីយើងបានស្នើសុំឱ្យថៃកុំលុបចោល MOU នេះក៏ដោយ ថៃនៅតែសម្រេចលុបចោល។ ដូច្នេះ យើងគ្មានជម្រើសផ្សេងក្រៅពីទៅប្រើយន្តការផ្សះផ្សានោះទេ។ ទីពីរ៖ មិនមានលក្ខខណ្ឌ ឬកិច្ចព្រមព្រៀងណាមួយដែលហាមឃាត់សកម្មភាពនេះឡើយ។ សំណួរ៖ ហាក់ដូចជាកម្ពុជា និងថៃមានទស្សនៈខុសគ្នាចំពោះអ្វីដែលគួរត្រូវបានពិភាក្សានៅក្នុងដំណើរការរបស់អង្គការសហប្រជាជាតិ។ ថៃចង់ផ្តោតលើការកំណត់ព្រំដែនសមុទ្រ ខណៈកម្ពុជាចង់ផ្តោតលើការអភិវឌ្ឍរួមនៅតំបន់ដែលមានការអះអាងត្រួតស៊ីគ្នា។ ក្នុងនាមជាកាយវិការនៃឆន្ទៈល្អ តើកម្ពុជាអាចពិចារណាកំណត់វិសាលភាពនៃការពិភាក្សាឱ្យផ្តោតតែលើការកំណត់ព្រំដែនសមុទ្រដែរឬទេ? ចម្លើយ៖ ខ្ញុំគិតថា វានៅឆាប់ពេកក្នុងការនិយាយអំពីរឿងនេះ។ យើងត្រូវព្រមព្រៀងគ្នាលើដំណើរការតែងតាំងអាជ្ញាកណ្តាលជាមុនសិន។ ឥឡូវនេះ ភាគីទាំងពីរបានតែងតាំងអាជ្ញាកណ្តាលពីររូបរួចហើយ ហើយយើងកំពុងធ្វើការលើការជ្រើសរើសប្រធានអាជ្ញាកណ្តាល ដែលជាសមាជិកទី៥។ សំណួរ៖ ដូច្នេះសម្រាប់ពេលនេះ ការកំណត់វិសាលភាពនៃការពិភាក្សាមិនមែនជាជម្រើសដែលកម្ពុជានឹងពិចារណាទេឬ? ចម្លើយ៖ វាមិនមែនជាសំណើដែលយើងបានលើកឡើងទេ។ យើងបានស្នើឱ្យពិភាក្សាទាំងការកំណត់ព្រំដែន និងការអភិវឌ្ឍរួម។ ប៉ុន្តែ ដូចខ្ញុំបាននិយាយ សម្រាប់ដំណាក់កាលនេះ សូមផ្តោតលើការធ្វើឱ្យដំណើរការចាប់ផ្តើមទៅមុខសិន។ សំណួរ៖ សមាជិកព្រឹទ្ធសភា លី យ៉ុងផាត់ ត្រូវបានសហរដ្ឋអាមេរិកដាក់ទណ្ឌកម្មដោយសារការចោទប្រកាន់ពាក់ព័ន្ធនឹងឧក្រិដ្ឋកម្ម។ សមាជិកព្រឹទ្ធសភា កុក អាន ក៏ត្រូវបានដាក់ទណ្ឌកម្មពីបទពាក់ព័ន្ធនឹងការជួញដូរមនុស្ស។ តើលោកយល់ថា វិធានការរបស់សហរដ្ឋអាមេរិកមានភាពយុត្តិធម៌ដែរឬទេ? ចម្លើយ៖ ខ្ញុំគិតថា នេះជាបញ្ហាផ្ទាល់ខ្លួនរបស់ពួកគាត់។ សមាជិកព្រឹទ្ធសភាទាំងពីរបានជួលក្រុមមេធាវី ដើម្បីតតាំងតាមផ្លូវច្បាប់ និងស្វែងរកការបញ្ជាក់ភាពស្អាតស្អំរបស់ពួកគាត់។ សំណួរ៖ លោកបាននិយាយថា កម្ពុជានៅតែប្តេជ្ញាប្រយុទ្ធប្រឆាំងនឹងការបោកប្រាស់តាមអនឡាញ។ ដូច្នេះ តើកម្ពុជានឹងចាត់វិធានការដល់កម្រិតណាចំពោះឥស្សរជនដែលត្រូវបានភ្ជាប់ទៅនឹងសកម្មភាពឧក្រិដ្ឋកម្ម ឬការបោកប្រាស់? ចម្លើយ៖ យើងបានចាត់វិធានការលើមន្ត្រីមួយចំនួនរួចហើយ។ ឧទាហរណ៍ យើងបានដកតំណែងឧត្តមសេនីយ៍ផ្កាយ៣ ផ្កាយ២ និងផ្កាយ១ ដែលមានភស្តុតាងបង្ហាញថា ពាក់ព័ន្ធនឹងសកម្មភាពទាំងនេះ។ យើងក៏បានដកតំណែងអភិបាលខេត្ត និងស្នងការនគរបាលខេត្តមួយចំនួន ដែលមិនបានអនុវត្តការងារបង្ក្រាបប្រកបដោយប្រសិទ្ធភាព។ ការស៊ើបអង្កេតផ្សេងៗទៀតក៏កំពុងបន្តផងដែរ ខណៈយើងកំពុងដោះស្រាយបញ្ហានេះ។ សំណួរ៖ ដូច្នេះតើលោកយល់ថា វិធានការរបស់សហរដ្ឋអាមេរិកមានភាពយុត្តិធម៌ដែរឬទេ? ចម្លើយ៖ នោះគឺជាបញ្ហាដែលយើងនឹងរង់ចាំមើលលទ្ធផល បន្ទាប់ពីតុលាការ ឬក្រុមមេធាវីការពារក្តីបានបំពេញការងាររបស់ពួកគេ៕

ព័ត៌មានទាក់ទង