ខេត្តព្រះវិហារ៖យុទ្ធនាការនេះបានរៀបចំធ្វើឡើងក្រោមកិច្ចសហការយ៉ាងជិតស្និទ្ធរវាងរដ្ឋបាលស្រុកជាំក្សាន្ដ និងអង្គការអាដ្រាកម្ពុជា ប្រចាំខេត្តព្រះវិហារ តាមរយៈគម្រោង «យើងរួមគ្នា» ដោយមានចូលរួមពីលោកស្រី វ៉ន រតនា អភិបាលរងស្រុកជាំក្សាន្ដ តំណាងលោក ចិន ខន្តី អភិបាលស្រុក និងលោក រ័ត្ន រម្យនា ប្រធានគម្រោង «យើងរួមគ្នា» នៃអង្គការអាដ្រាកម្ពុជា ព្រមទាំងមានការចូលរួមពីមេឃុំ កម្លាំងប៉ុស្តិ៍រដ្ឋបាលឃុំ លោកគ្រូ អ្នកគ្រូ ប្រជាពលរដ្ឋ និងសិស្សានុសិស្សយ៉ាងច្រើនកុះករ នៅសហគមន៍អូរស្វាយ ស្ថិតក្នុងភូមិធម្មជាតិ ឃុំស្រអែម ស្រុកជាំក្សាន្ដ ខេត្តព្រះវិហារ នាថ្ងៃទី២៤ ខែមិថុនា ឆ្នាំ២០២៦។ អង្គការអាដ្រា សហការជាមួយអាជ្ញាធរស្រុកជាំក្សាន្ត ខេត្តព្រះវិហារ បើកយុទ្ធនាការផ្សព្វផ្សាយពីសារៈសំខាន់ក្រោមប្រធានបទ «ការផ្សព្វផ្សាយដើម្បីកាត់បន្ថយការរៀបអាពាហ៍ពិពាហ៍វ័យក្មេង និងការមានផ្ទៃពោះដោយអចេតនា សម្រាប់យុវវ័យអាយុក្រោម១៨ឆ្នាំ និងពង្រឹងការអនុវត្តច្បាប់»។ នៅក្នុងឱកាសនោះ លោកស្រី វ៉ន រតនា បានគូសបញ្ជាក់ថា ការរៀបការនៅវ័យក្មេង និងការមានផ្ទៃពោះដោយអចេតនាក្នុងចំណោមយុវវ័យ គឺជាបញ្ហាប្រឈមមួយដែលជះឥទ្ធិពលអវិជ្ជមានដល់ការសិក្សា សុខភាព និងអនាគតរបស់ក្មេងជំទង់។ លោកស្រីអភិបាលរងស្រុក បានថ្លែងអំពាវនាវឱ្យមាតាបិតា អាណាព្យាបាល លោកគ្រូ អ្នកគ្រូ និងសហគមន៍ទាំងមូល ចូលរួមផ្សព្វផ្សាយ អប់រំ និងណែនាំកូនចៅ ឱ្យយល់ដឹងពីផលប៉ះពាល់ នៃការរៀបការមុនអាយុ និងលើកទឹកចិត្តឱ្យយុវវ័យផ្តោតសំខាន់លើការសិក្សា និងការអភិវឌ្ឍសមត្ថភាពរបស់ខ្លួន។ ជាមួយគ្នានេះ លោក រ័ត្ន រម្យនា ប្រធានគម្រោង «យើងរួមគ្នា» នៃអង្គការអាដ្រាកម្ពុជា បានលើកឡើងថា ការបង្កើនការយល់ដឹងដល់យុវវ័យ និងសហគមន៍ គឺជាយន្តការសំខាន់មួយ ក្នុងការកាត់បន្ថយការរៀបការវ័យក្មេង និងការមានផ្ទៃពោះដោយអចេតនា។ លោកបានបញ្ជាក់ថា អង្គការអាដ្រាកម្ពុជា នឹងបន្តសហការជាមួយអាជ្ញាធរមូលដ្ឋាន និងដៃគូពាក់ព័ន្ធ ដើម្បីជំរុញការអប់រំ និងពង្រឹងការអនុវត្តច្បាប់ សំដៅការពារសិទ្ធិ និងលើកកម្ពស់សុខុមាលភាពរបស់កុមារ និងយុវវ័យ។ តាមរយៈយុទ្ធនាការនេះ អ្នកចូលរួមបានទទួលនូវចំណេះដឹង និងការយល់ដឹងបន្ថែមអំពីផលប៉ះពាល់នៃការរៀបការនៅវ័យក្មេង ការមានផ្ទៃពោះដោយអចេតនា និងសារៈសំខាន់នៃការបន្តការសិក្សា ដើម្បីកសាងអនាគតដ៏ភ្លឺស្វាងសម្រាប់ខ្លួនឯង គ្រួសារ និងសង្គមជាតិ៕

ព័ត៌មានទាក់ទង