រាជធានីភ្នំពេញ៖ ការបង្ហាញសុទិដ្ឋិនិយមនេះ ធ្វើឡើងក្នុងសន្និសីទសារព័ត៌មាន ស្ដីពីការត្រៀមរៀបចំកម្មវិធី Ganzberg Kombat Grand Pric Kun Khmer & Taekwondo នៅព្រឹកថ្ងៃសុក្រនេះ មុនព្រឹត្តិការណ៍នេះ ត្រៀមរៀបចំជាផ្លូវការ នាយប់ថ្ងៃទី២៧ ខែមិថុនា ឆ្នាំ២០២៦ ស្អែក នៅមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់)។ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ រំពឹងការបើកទំព័រប្រវត្តិសាស្ដ្រថ្មី នៃព្រឹត្តិការណ៍ Kombat Kun Khmer នឹងក្លាយជាចលនាថ្មីមួយទៀត ដើម្បីរុញមរតកក្បាច់គុនបុរាណខ្មែរ ក្លាយជាកីឡា ដែលមានការហ្វឹកហាត់ និងប្រកួតជាសកល នាថ្ងៃអនាគត។ លោកថា នេះគឺជាលើកដំបូងដែលសហព័ន្ធ និងស្ថាប័ន Kombat Global បានសហការរៀបចំព្រឹត្តិការណ៍អន្ដរជាតិនេះឡើង ក្រោយស្ថាប័នទាំងពីរ បានចុះអនុស្សារណៈយោគយល់គ្នា (MoU)។ លើសពីភាពអស្ចារ្យ ដែលមានការប្រកួត ទាំងគុនខ្មែរ និងតេក្វាន់ដូកម្រិតពិភពលោក នេះគឺជាជំហានថ្មីមួយ ក្នុងការនាំគុនខ្មែរចូលក្នុងប្រព័ន្ធកីឡាអាជីពអន្ដរជាតិ ហើយផ្សព្វផ្សាយទៅកាន់ពិភពលោក និងជាផ្នែកមួយនៃចក្ខុវិស័យរួមក្នុងការលើកកម្ពស់គុនខ្មែរឲ្យក្លាយជាកីឡាករមួយរបស់សកលលោកផងដែរ។ ប្រធានសហព័ន្ធដដែលបន្ដថា បច្ចុប្បន្ន Kombat Global មានប្រទេសសមាជិកចំនួន ១២១ប្រទេស និងមានក្លិបរាប់ពាន់ទូទាំងពិភពលោក។ ក្រៅពីកិច្ចសហការរៀបចំព្រឹត្តិការណ៍ បណ្ដាក្លិបសមាជិកទាំងអស់នោះ ក៏បានឯកភាពនឹងបញ្ចូលគុនខ្មែរ ក្នុងកម្មវិធីហ្វឹកហាត់ប្រចាំក្លិប ។ នេះគឺជាការគាំទ្រមួយដ៏ធំពីស្ថាប័នអន្ដរជាតិ ក្នុងការរួមចំណែកធ្វើឲ្យគុនខ្មែរ ត្រូវបានទទួលស្គាល់ដោយប្រទេសសមាជិកយ៉ាងហោច ១២១ប្រទេស ក៏ដូចជាការហ្វឹកហាត់ និងផ្សព្វផ្សាយពីគុនខ្មែរ តាមរយៈការប្រកួត ទាំងនៅកម្ពុជា និងបណ្ដាប្រទេសសមាជិកទាំងអស់។ លោក ខូវ ឆាយ សង្កត់ធ្ងន់ថា «នេះគឺជាសញ្ញាណដ៏ល្អវិសេសវិសាលមួយសម្រាប់គុនខ្មែរ ដែលបង្ហាញថា ពិភពលោកកំពុងតែចាប់អារម្មណ៍ និងចោលភ្នែកមកលើគុនខ្មែរ ក៏ដូចជាប្រទេសកម្ពុជា ហើយចាប់ដៃគូសហការ បណ្ដុះបណ្ដាល ផ្នែកវិស័យកីឡាប្រយុទ្ធ ក្រោមកិច្ចសហការជាមួយស្ថាប័ន Kombat Global ។ នៅថ្ងៃអនាគត យើងនឹងសហការជាមួយស្ថាប័នផ្សេងៗទៀត ដើម្បីជំរុញការធ្វើសកលភាវូបនីយកម្មនូវកីឡាប្រពៃណីរបស់យើងឲ្យឈានទៅរកកម្រិតមួយ ដែលទទួលស្គាល់ជាលក្ខណៈសកល លើសពីកីឡាប្រពៃណី ដែលហ្វឹកហាត់ និងប្រកួតត្រឹមក្នុងស្រុក គឺក្លាយជាកីឡាដែលហ្វឹកហាត់ និងប្រកួតជាសកលតែម្ដង»។ ជាមួយគ្នាលោកប្រធាន Rick W.Shin ប្រធានស្ថាប័ន Kombat Global បាន​ទទួលស្គាល់​ពី​ប្រវត្តិ​ដ៏យូរលង់​នៃក្បាច់​គុន​របស់​​ដូនតា​ខ្មែរ។ លោកថា Kombat ត្រូវបានគេទទួលស្គាល់ និងមានការប្រកួតទូទាំងពិភពលោកជាច្រើនឆ្នាំមកហើយ ហើយពេលនេះ ពិភពលោក នឹងបានតាមដាន និងត្រៀមទទួលនូវអ្វីដែលជាការប្រកួតប្រជែងដ៏អស្ចារ្យ នូវកីឡាប្រដាល់គុនខ្មែរ ដែលលោកហៅថា Kombat Kun Khmer ជាមួយការបើកទំព័រដំបូងពីទឹកដីកំណើនគុនខ្មែរ ដែលនឹងត្រូវរៀបចំនៅស្ដាតចាស់ នារាត្រីថ្ងៃសៅរ៍ស្អែក និងបើកឲ្យមហាជនចូលរួមទស្សនាដោយសេរី។ ជាមួយកម្មវិធីដំបូង ក្រោយការចាប់ដៃគ្នារវាងគុនខ្មែរ និងស្ថាប័ន Kombat ខាងលើ រួមមានការប្រកួតវិញ្ញាសាគុនខ្មែរ ៤គូ និងតេក្វាន់ដូ ៤គូ ក្នុងនោះក៏មានវត្តមានកីឡាករ-កីឡាការិនី ៦រូប ត្រូវជួបតតាំងជាមួយកីឡាករ-កីឡាការិនីបរទេសផ្សេងៗគ្នាផងដែរ។ ចំណែកគូឯក ដែលត្រូវប្រកួតដណ្ដើមខ្សែក្រវាត់ពិភពលោកក្នុងព្រឹត្តិការណ៍នេះ គឺជាជំនួបរវាងកីឡាករអេស្ប៉ាញ Martin Iglesias Rial ប៉ះកីឡាករប្រេស៊ីល Romenig Hervano ក្នុងប្រភេទកីឡាតេក្វាន់ដូទម្ងន់ ៧៤គីឡូក្រាម។ នេះគឺជាបទពិសោធន៍ថ្មីមួយទៀត សម្រាប់ការប្រកួតក្នុងទ្រង់ ដែលមានចម្រុះ ទាំងគុនខ្មែរ និងតេក្វាន់ដូបែបនេះ៕

ព័ត៌មានទាក់ទង