រាជធានីភ្នំពេញ៖ក្នុងជំនួបពិភាក្សាការងារនេះ លោកប្រធានគណៈប្រតិភូ បានចែករំលែកបទពិសោធន៍មួយចំនួន ក្នុងការទាក់ទាញវិនិយោគបរទេសរបស់អូស្រ្តាលី ព្រមទាំងបញ្ជាក់អំពីគោលបំណងរបស់រដ្ឋាភិបាលអូស្រ្តាលី ក្នុងការជំរុញវិនិយោគផ្ទាល់ពីអូស្រា្តលីមកកាន់បណ្ដាប្រទេស ក្នុងតំបន់អាស៊ីអាគ្នេយ៍ រួមទាំងកម្ពុជា ផងដែរ។ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៧ ខែមិថុនា ឆ្នាំ២០២៦ បានដឹកនាំសហការីទទួលជួបពិភាក្សាការងារជាមួយគណៈប្រតិភូអូស្រា្តលី ដឹកនាំដោយ លោក Michael Growder លេខាធិការរងទី១ ទទួលបន្ទុកតំបន់អាស៊ីខាងកើត នៃក្រសួងការបរទេសនិងពាណិជ្ជកម្មអូស្ត្រាលី។ លោកអគ្គលេខាធិការ បានបម្រាបជូនអំពីបរិយាកាសវិនិយោគនៅកម្ពុជា ជាពិសេសវឌ្ឍនភាព និងភាពជោគជ័យនៃការអនុវត្តគម្រោងវិនិយោគក្នុងតំបន់សេដ្ឋកិច្ចពិសេស ដែលនាពេលបច្ចុប្បន្នវិនិយោគិនភាគច្រើនមកពីប្រទេសចិន។ យ៉ាងណាមិញ កម្ពុជាបាន និងកំពុងព្យាយាមទាក់ទាញវិនិយោគិនពីប្រទេសផ្សេងៗ តាមរយៈការរៀបចំបេសកកម្មគោះទ្វាវិនិយោគតាមប្រទេសគោលដៅមួយចំនួន។ ទន្ទឹមនេះ ក្រុមប្រឹក្សាអភិវឌ្ឍន៍កម្ពុជា កំពុងពិនិត្យ និងធ្វើកំណែទម្រង់ស្ថាប័ន សំដៅពង្រឹងមុខងាររបស់ទីភ្នាក់ងារជំរុញវិនិយោគកម្ពុជា ស្របតាមឧត្តមានុវត្តន៍អន្តរជាតិ។ ក្នុងន័យនេះ កម្ពុជានឹងបន្តធ្វើឱ្យកាន់តែប្រសើរឡើងនូវបរិយាកាសវិនិយោគ និងធុរកិច្ច ដើម្បីត្រៀមខ្លួនចាប់យកវិនិយោគិនក្នុងឧស្សាហកម្មថ្មីៗ ដែលមានតម្លៃបន្ថែមខ្ពស់។ លោកអគ្គលេខាធិការក៏បានរំលេចផងដែរ អំពីកិច្ចសហប្រតិបត្តិការរវាង ក.អ.ក. និងរដ្ឋាភិបាលអូស្រ្តាលី រាប់ចាប់តាំងពីកម្មវិធីខ្សែច្រវាក់តម្លៃកសិកម្មកម្ពុជា (CAVAC) រហូតដល់កម្មវិធីភាពជាដៃគូ កម្ពុជា អូស្រ្តាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) នាពេលបច្ចុប្បន្ន ដែលបានធ្វើការជាមួយគ្នាលើការងារជាច្រើន ជាពិសេសលើការជំរុញវិនិយោគក្នុងវិស័យកសិកម្ម និងកសិ-ឧស្សាហកម្ម។ ក្នុងន័យនេះ លោកបានលើកទឹកចិត្តឱ្យវិនិយោគិនអូស្រា្តលីមកបណ្ដាក់ទុនវិនិយោគក្នុងវិស័យកសិកម្ម និងកសិ-ឧស្សាហកម្ម ជាពិសេសការវិយោគលើវិស័យការកែឆ្នៃគ្រាប់ស្វាយចន្ទី ជ័រកៅស៊ូ និងឧស្សាហកម្មឈើដាំ និងផលិតផលពីឈើ នៅកម្ពុជាឱ្យបានច្រើន នាពេលខាងមុខ ខណៈកម្ពុជាបាន និងកំពុងរៀបចំយន្តការអភិវឌ្ឍន៍សួនកសិ-ឧស្សាហកម្ម៕

ព័ត៌មានទាក់ទង