នៅពេលវិបត្តិនៅមជ្ឈិមបូព៌ាផ្ទុះឡើង ហើយពលរដ្ឋសិង្ហបុរី បានជាប់គាំងនៅក្រៅ​ប្រទេស យើងបានធ្វើសកម្មភាពភ្លាមៗ។ យើងបានត្រៀមជើងហោះហើរបន្ថែម។ នៅ​ពេល​ស្ថាន​ការណ៍​​កាន់តែគ្រោះថ្នាក់ យើងបានបញ្ជូនយន្ដហោះរបស់កងទ័ពអាកាស​សិង្ហ​បុរី។ យើង​បានយកគ្រប់គ្នាត្រឡប់មកផ្ទះវិញ។ នៅព្រឹកថ្ងៃសុក្រ ទី១ ខែឧសភា ឆ្នាំ២០២៦នេះ លោក ឡរ៉េន វ័ង នាយករដ្ឋ​មន្ត្រីសិង្ហបុរី បានអញ្ជើញប្រារព្ធទិវាពលកម្មអន្តរជាតិ។ ក្នុងឱកាសនោះ លោកបានលើកឡើងនូវអារម្មណ៍ពលរដ្ឋសិង្ហបុរីមួយរូប ដែលត្រូវបាន​ជម្លៀស​ចេញពីទីក្រុងរីយ៉ាដ ប្រទេសអារ៉ាប់សាអូឌីត ពេលផ្ទុះសង្គ្រាមនៅមជ្ឈិមបូព៌ា។ លោកនាយករដ្ឋមន្ត្រី បានអានសំបុត្រនោះ ជាមួយអារម្មណ៍ក្តុកក្តួលជាខ្លាំង។ ជនជាតិសិង្ហបុរីម្នាក់នៅលើជើងហោះនោះមានឈ្មោះ Nishar Keshvani បានសរសេរ​សំបុត្រ​មួយបង្ហាញពីអារម្មណ៍ដែលបានត្រឡប់មកផ្ទះវិញ នៅលើជើងហោះហើរមួយ​របស់​កង​ទ័ពអាកាស RSAF។ ខ្ញុំសូមអាននូវអ្វីដែលគាត់បានសរសេរ។ «ស្វាគមន៍ត្រឡប់មកផ្ទះវិញ»។ ពាក្យ២ម៉ាត់បានចាក់ដោតអារម្មណ៍របស់ខ្ញុំមិនធ្លាប់​មានពី​មុន​មក។ ពាក្យ២ម៉ាត់នោះ បានចេញពីមាត់កងទ័ពអាកាសសិង្ហបុរី ក្នុងពេលដែល​គ្រួសារ​របស់ខ្ញុំជិះនៅលើជើងហោះហើរជម្លៀសខ្លួនក្នុងទីក្រុងរីយ៉ាដ។ យន្ដហោះរបស់យើង​មិន​ទាន់​ហោះចេញទេ។ ប៉ុន្តែនៅពេលនោះ បរិយាការនៅក្នុងការប៊ីនយន្ដហោះបានផ្លាស់ប្ដូរ។ អ្នកដំណើរបាននាំគ្នាសម្លឹងមើលជុំវិញយ៉ាងស្ងៀមស្ងាត់។ អ្នកខ្លះញញឹម។ អ្នកខ្លះទៀតជូត​ទឹក​ភ្នែក ខណៈយន្ដហោះហោះឡើងពីផ្លូវរត់ មនុស្សម្នាបាននាំគ្នាទះដៃសាទរ។ បន្ទាប់មក សំឡេងបានបន្លឺឡើងបន្តិចម្ដងៗនៅទូទាំងកាប៊ីន។ អ្នកខ្លះបាននាំគ្នាច្រៀងចម្រៀងជាតិសិង្ហបុរី ហើយអ្នកផ្សេងទៀតបាននាំគ្នាច្រៀងតាម​ក្រោយ។ នេះជាពេលវេលាមួយមិនអាចបំភ្លេចបាន នៅពេលដែលអ្នកដឹងថា ផ្ទះមិន​មែន​គ្រាន់តែជាទីកន្លែងមួយនៅលើផែនទីនោះទេ តែវាមានអត្ថន័យជ្រាលជ្រៅណាស់។ វាជា​អត្តសញ្ញាណរួម អារម្មណ៍ជាជនរួមជាតិ និងការទទួលដឹងថា នៅពេលមានបញ្ហា ប្រទេសរបស់អ្នកនឹងទៅជួយអ្នក។ ខណៈយន្ដហោះ RSAF របស់យើងដឹកពួកយើងត្រឡប់ទៅផ្ទះវិញ នៅយប់នោះពាក្យ «ស្វាគមន៍ត្រលប់មកផ្ទះវិញ» មានអត្ថន័យថ្មីទាំងស្រុង។ វាមិនមែនគ្រាន់តែជាការ​ស្វា​គមន៍​ទេ។ តែវាជាពាក្យសន្យាមួយថា មិនថាពលរដ្ឋសិង្ហបុរី ស្ថិតនៅទីណានោះទេ នៅ​ក្នុង​ពិភពលោក ប្រទេសរបស់យើងតែងតែយកចិត្តទុកដាក់ចំពោះ​ប្រជាជនខ្លួន​ឯង​ជា​និច្ច ហើយវាជាពាក្យសន្យាមួយដែលមានតម្លៃ គួរតែ ត្រូវបានការពារពីមួយជំនាន់​ទៅ​មួយ​ជំនាន់។ បងប្អូនប្រុសស្រីទាំងឡាយ ពាក្យសន្យានេះស្ថិតនៅចំកណ្ដាល​នៃអត្ត​សញ្ញាណ​ថា តើពួកយើងជានរណា? ដូច្នេះមិនថា មានវិបត្តិថាមពល ឬការវិវត្តន៍ AI យើងនឹង​យក​ចិត្តទុកដាក់ចំពោះប្រជាជនរបស់យើង។ នឹងមិនមានពលរដ្ឋសិង្ហបុរី​ណាម្នាក់ ​ត្រូវបាន​បោះបង់ចោលនោះទេ៕

ព័ត៌មានទាក់ទង