ក្រសួងការបរទេសអាមេរិក បញ្ជាក់ថានឹងមានការធ្វើលិខិតឆ្លងដែន ដាក់រូបភាពរបស់លោក ត្រាំ នៅក្នុងនោះ ក្នុងចំនួនកំណត់ ដើម្បីប្រារព្ធខួបឯករាជ្យលើកទី២៥០ របស់សហរដ្ឋអាមេរិក នៅឆ្នាំនេះ។ អក្សរអមដោយរូបភាពពីរសន្លឹក នឹងលេចឡើងក្នុងលិខិតឆ្លងដែន។ មួយសន្លឹកជារូបថតផ្លូវការរបស់លោក ត្រាំ ដាក់ពីលើសេចក្តីប្រកាសឯករាជ្យ ជាមួយហត្ថលេខារបស់លោក ជាពណ៌មាស នៅពីក្រោម។ រូបទីពីរ គឺជាគំនូរប្រវត្តិសាស្ត្ររបស់បិតាស្ថាបនិកសហរដ្ឋអាមេរិក។ ក្រុមមន្រ្តីអាមេរិកបាននិយាយថា រូបភាពរបស់លោក ដូណាល់ ត្រាំ នឹងលេចឡើងក្នុងលិខិតឆ្លងដែនអាមេរិកមួយចំនួន នាពេលឆាប់ៗ ដែលជាការបំបែកបទដ្ឋានផ្សេងទៀត បន្ទាប់ពីលំនាំស្រដៀងគ្នានេះ ត្រូវបានធ្វើឡើងតាមស្ថាប័ននានារបស់រដ្ឋាភិបាល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃពុធ ទី២៩ ខែមេសា ឆ្នាំ២០២៦។ តាមបណ្តាញសង្គម X អ្នកនាំពាក្យ លោក Tommy Pigott គូសបញ្ជាក់ថា ខណៈដែលសហរដ្ឋអាមេរិកនឹងប្រារព្ធខួបលើកទី២៥០ ក្នុងខែកក្កដាខាងមុខ ក្រសួងការបរទេសកំពុងរៀបចំចេញលិខិតឆ្លងដែនអាមេរិក ដែលត្រូវបានរចនាឡើងជាពិសេសមួយចំនួនមានកំណត់ ដើម្បីរំលឹកដល់ឱកាសប្រវត្តិសាស្ត្រនេះ។ មន្ត្រីក្រសួងការបរទេសម្នាក់ទៀតដែលសុំមិនបញ្ចេញឈ្មោះ បាននិយាយថា លិខិតឆ្លងដែនដែលមានរូបភាពរបស់លោក ត្រាំ នឹងមានធ្វើតែនៅក្នុងទីក្រុងវ៉ាស៉ីនតោនប៉ុណ្ណោះ ដរាបណាមានសុពលភាព ហើយមិនគិតថ្លៃបន្ថែមទេ។ ភ្លាមៗគេមិនច្បាស់ទេថាតើអ្នកដាក់ពាក្យសុំលិខិតឆ្លងដែន អាចបដិសេធការបោះពុម្ពពិសេសនេះឬអត់៕

ព័ត៌មានទាក់ទង