រាជធានីភ្នំពេញ៖ក្នុងពិធីប្រគល់ និងទទួលជំនួយរថយន្តដឹកសំរាមរបស់ប្រទេសជប៉ុន បានរៀបចំឡើង​នៅ​ទីស្តីការក្រសួងបរិស្ថាន នាថ្ងៃទី២៧ ខែមេសា ឆ្នាំ ២០២៦ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានថ្លែអំណរគុណដល់រាជរដ្ឋាភិបាល​ជប៉ុន​ ចំពោះ​ការគាំទ្រជាបន្តបន្ទាប់ និងបានចាត់ទុកថា ជំនួយនេះ ចូលរួមចំណែកដ៏មាន​អត្ថន័យ​ក្នុង​ការពង្រឹងសមត្ថភា ពគ្រប់គ្រងកាកសំណល់នៅថ្នាក់ក្រោមជាតិ។ រថយន្តដឹកសំរាម​ត្រូវ​បានបែងចែកបន្តបន្ទាប់ទៅអាជ្ញាធរខេត្តភ្លាមៗ ដែលបានជួយជំរុញឱ្យរដ្ឋបាល​មូលដ្ឋាន​បង្កើនសេវាប្រមូល និងទុកដាក់សំរាមក្នុងដែនសមត្ថកិច្ចរបស់ខ្លួនបានល្អប្រសើរ។ រដ្ឋាភិបាលជប៉ុន បានផ្តល់រថយន្តដឹកសំរាមបន្ថែមចំនួន ១០គ្រឿងទៀត ដល់ក្រសួងបរិស្ថានកម្ពុជា។ នេះជាជំនួយលើកទីបី និងធ្វើឱ្យចំនួនរថយន្ត ដែលជាជំនួយរបស់ជប៉ុន សរុបចំនួន៣០គ្រឿងហើយ។ រថយន្តទាំងនេះ ត្រូវបានប្រគល់ជាផ្លូវការដោយលោក Ueno Atsushi ទៅក្រសួង​បរិ​ស្ថាន ក្នុងពិធីផ្លូវការមួយដោយបញ្ជាក់ពីកិច្ចសហប្រតិបត្តិការ ជាបន្តបន្ទាប់រវាងជប៉ុន និង​កម្ពុជា ក្នុងកិច្ចគាំពារបរិស្ថាន។ លោករដ្ឋមន្ត្រីបរិស្ថាន បានសង្កត់ធ្ងន់ថា កិច្ចសហប្រតិបត្តិការនេះ បានគាំទ្រយុទ្ធ​សាស្ត្រ​ច​ក្រាវិស័យបរិស្ថានរបស់កម្ពុជា ដែលមានគោលបំណងលើកកម្ពស់ «ស្អាត បៃតង និង​ចីរភាព»របស់ប្រទេសកម្ពុជា ជាពិសេសប្រព័ន្ធគ្រប់គ្រងសំរាម សំណល់ប្លាស្ទិក​ឱ្យមាន​ភាពប្រសើរឡើង និងពិតជាមានសារៈសំខាន់ក្នុងការសម្រេចបាន នូវគោលដៅបរិ​ស្ថាន​រយៈ​ពេលវែង។ លោកបណ្ឌិត អ៊ាង សុផល្លែត បានលើកទឹកចិត្តដល់អាជ្ញាធរខេត្តឱ្យថែរក្សាយាន​យន្ត​ឱ្យ​បានត្រឹមត្រូវ និងធានាបាននូវការប្រើប្រាស់ប្រកបដោយប្រសិទ្ធភាព។ លោកបណ្ឌិត អ៊ាង សុផល្លែត បានជំរុញឱ្យបន្តអនុវត្តយុទ្ធនាការដែលបានដាក់ចេញ ដោយ​ក្រសួងបរិស្ថានជាបន្តទៀត និងធ្វើការអំពាវនាវឱ្យកិច្ចខិតខំប្រឹងប្រែងប្រែក្លាយ​ពី​យុទ្ធនាការទាំងនេះ ដើម្បីវិវត្តទៅជាចលនាសង្គម និងទម្លាប់ប្រចាំថ្ងៃយូរអង្វែង​ក្នុង​ចំណោមប្រជាពលរដ្ឋ។ លោករដ្ឋមន្ត្រីបានណែនាំដល់មន្ទីរបរិស្ថានរាជធានី ខេត្ត ត្រូវបន្តអនុវត្តវិធី​សាស្រ្ត​ប្រកប​ដោយវិជ្ជាជីវៈ និងការទទួលខុសត្រូវក្នុងការដោះស្រាយបញ្ហាការបំពុលខ្យល់ ដី និង​ទឹក។ លោកបណ្ឌិត អ៊ាង សុផល្លែត បានព្រមានជាថ្មីដល់ប្រតិបត្តិករប្រមូលសំរាម​ដែលដុត​សំរាម ឬអនុញ្ញាតឱ្យមានភ្លើងឆេះ នៅកន្លែងចាក់សំរាមនឹងប្រឈម​មុខនឹងការ​ផ្តន្ទា​ទោស​យ៉ាងតឹងរ៉ឹង រួមទាំងការដកហូតអាជ្ញាប័ណ្ណរបស់ពួកគេ។ លោកបណ្ឌិត អ៊ាង សុផល្លែត បានបន្ថែមទៀតលើការទទួលខុសត្រូវ និងស្នើឱ្យអាជ្ញា​ធរ​សហការចូលរួម កំណត់អត្តសញ្ញាណ និងធ្វើសកម្មភាពទប់ស្កាត់លើប្រភពនៃការបំពុល ឱ្យបានឆាប់រហ័សកុំបង្អង់យូរ។ «ប្រសិនបើមានការបំពុលកើតឡើង មន្ទីរបរិស្ថាន ត្រូវតែស្វែងរកប្រភពបំពុល និងចាត់​វិធាន​ការ»។ នេះជាការលើកឡើងរបស់រដ្ឋមន្ត្រីក្រសួងបរិស្ថាន។ លោករដ្ឋមន្ត្រី បានព្រមានដល់មន្រ្តីបរិស្ថាន ដែលមិនមានការទទួលខុសត្រូវ និងរក​ប្រភព​បំពុល​មិនឃើញ ហើយនិយាយថាប្រភពមិនអាចកំណត់អត្តសញ្ញាណបាន ក្នុង​ករណីមានការបំពុល មន្រ្តីទាំងនោះគួរតែចុះចេញពីតំណែង។ លោកបណ្ឌិត អ៊ាង សុផល្លែត បានបន្ថែមថា វិធានការទាំងនេះឆ្លុះបញ្ចាំងពីមន្ត្រីដែល​មិន​បំពេញកាតព្វកិច្ចរបស់ពួកគេ និងការជំរុញដ៏ទូលំទូលាយរបស់កម្ពុជា ក្នុងការពង្រឹង​អភិ​បាលកិច្ចបរិស្ថាន កែលម្អប្រព័ន្ធគ្រប់គ្រងសំរាម និងឈានទៅរកអនាគតដ៏ស្អាត និងមាននិរន្តរភាពជាងមុន៕

ព័ត៌មានទាក់ទង