លក្ខណៈពិសេសនៃបច្ចេកវិទ្យានេះ គឺស្ថិតនៅលើភាពបត់បែននៃដំណើរការរបស់វា។ នៅលើដី វាក្លាយជារថយន្តដឹកជញ្ជូន និងជាស្ថានីយសាកថ្មឱ្យយន្តហោះ ប៉ុន្តែនៅពេលចង់ហោះហើរ យន្តហោះតូចដែលនៅខាងក្នុងនឹងរុញខ្លួនចេញមកក្រៅ រួចហោះឡើងត្រង់ទៅលើអាកាសដាច់ដោយឡែកពីគ្នា។ គម្រោងនេះមិនត្រឹមតែជាការស្រមៃទៀតឡើយ ខណៈដែលក្រុមហ៊ុនបានឆ្លងកាត់ការហោះហើរសាកល្បងដោយជោគជ័យ និងទទួលបានការចាប់អារម្មណ៍ខ្លាំងពីសំណាក់អ្នកវិនិយោគទូទាំងពិភពលោក។ ក្រុមហ៊ុនបច្ចេកវិទ្យាយក្ស Xpeng របស់ចិន កំពុងធ្វើឱ្យពិភពលោកចាប់អារម្មណ៍យ៉ាងខ្លាំង តាមរយៈការប្រកាសត្រៀមបញ្ចេញលក់ «រថយន្តហោះ» ជាផ្លូវការក្នុងទ្រង់ទ្រាយធំនៅឆ្នាំ ២០២៧។ រថយន្តហោះនេះ ត្រូវបានគេស្គាល់ថាជាម៉ូដែល «Land Aircraft Carrier» ដែលមានរូបរាងប្លែកពីគេបំផុត ដោយវាត្រូវបានបែងចែកជាពីរផ្នែក៖ រថយន្តមេកង់ ៦ សម្រាប់បើកបរលើផ្លូវថ្នល់ និងយន្តហោះអគ្គិសនីដាច់ដោយឡែកមួយទៀត ដែលបង្កប់ខ្លួននៅក្នុងឃ្លាំងខាងក្រោយនៃរថយន្តមេនោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៣ ខែមេសា ឆ្នាំ២០២៦។ ក្រៅពីបច្ចេកវិទ្យាហោះហើរ លោក Brian Gu ប្រធានក្រុមហ៊ុន Xpeng បានបង្ហើបពីមហិច្ឆតាដ៏ធំមួយទៀត គឺការផលិត «មនុស្សយន្តឆ្លាតវៃ» (Humanoid Robots) ជាទ្រង់ទ្រាយធំ ដែលនឹងចាប់ផ្តើមនៅត្រីមាសទី ៤ ឆ្នាំនេះ។ មនុស្សយន្តទាំងនេះ ត្រូវបានរចនាឡើងដើម្បីជួយសម្រួលដល់ការងារក្នុងរោងចក្រផលិតរថយន្ត និងអាចឈានទៅដល់ការប្រើប្រាស់ក្នុងជីវភាពរស់នៅប្រចាំថ្ងៃនាពេលអនាគត។ ការបោះជំហានចូលក្នុងវិស័យមនុស្សយន្តនេះ បង្ហាញថា Xpeng មិនមែនគ្រាន់តែជាក្រុមហ៊ុនផលិតរថយន្តអគ្គិសនីធម្មតានោះទេ ប៉ុន្តែជាក្រុមហ៊ុនបច្ចេកវិទ្យា AI ដ៏ទំនើបមួយ។ គួរជម្រាបថា ការផ្លាស់ប្តូរយុទ្ធសាស្ត្ររបស់ Xpeng ក្នុងការដាក់បញ្ចូលបច្ចេកវិទ្យាហោះហើរ និងមនុស្សយន្តចូលក្នុងខ្សែសង្វាក់ផលិតកម្ម គឺជាផ្នែកមួយនៃការពង្រីកឥទ្ធិពលរបស់ខ្លួនជាមួយដៃគូអន្តរជាតិ។ លោក Brian Gu បានបញ្ជាក់ថា ក្រុមហ៊ុនមានផែនការសហការយ៉ាងស្អិតរមួតជាមួយដៃគូខាងក្រៅនៅឆ្នាំក្រោយ ដើម្បីជំរុញឱ្យបច្ចេកវិទ្យាទាំងនេះកាន់តែមានប្រសិទ្ធភាព និងតម្លៃសមរម្យសម្រាប់ទីផ្សារ។ ការវិវត្តនេះ មិនត្រឹមតែជាបដិវត្តន៍ក្នុងវិស័យដឹកជញ្ជូនប៉ុណ្ណោះទេ ប៉ុន្តែវាក៏ជាការបើកទំព័រប្រវត្តិសាស្ត្រថ្មីនៃបច្ចេកវិទ្យាដែលយើងធ្លាប់តែឃើញក្នុងភាពយន្តវិទ្យាសាស្ត្រ៕

ព័ត៌មានទាក់ទង