ខេត្តតាកែវ៖នាឱកាសនោះ លោក វ៉ី សំណាង បានលើកឡើងពីការប្រឹងប្រែងរបស់រាជរដ្ឋាភិបាល អាជ្ញាធរខេត្ត ជាពិសេសមន្រ្តីជំនាញ ក្នុងការចុះមកវាស់វែងដីធ្លីធ្វើប្លង់កម្មសិទ្ធជូនប្រជាពលរដ្ឋ ដើម្បីឱ្យប្រជាពលរដ្ឋមានភាពកក់ក្តៅលើការ គ្រប់គ្រង់ដីធ្លីរបស់ខ្លួន ក៏ដូចជាបង្កលក្ខណៈងាយស្រួលដល់ប្រជាពលរដ្ឋយកទៅប្រើប្រាស់ លើការប្រកបអាជីវកម្មផ្សេងៗតាមតម្រូវការចាំបាច់ ឬក៏អាចធ្វើប្រទានកម្មដល់កូនចៅផងដែរ។ ប័ណ្ណសម្គាល់អចលនវត្ថុជិត២,០០០ប័ណ្ណ ត្រូវបានលោក វ៉ី សំណាង អភិបាលខេត្តតាកែវ នៅថ្ងៃទី៦ ខែសីហា ឆ្នាំ២០២៥ បានប្រគល់ជូនបងប្អូនប្រជាពលរដ្ឋនៅក្នុងភូមិចំនួន៥របស់ឃុំព្រៃយុថ្កា ស្រុកកោះអណ្ដែត ខេត្តតាកែវ។ អភិបាលខេត្តតាកែវ បានបន្តថា ការផ្ដល់ប្លង់កម្មសិទ្ធិនេះវាក៍ជួយកាត់បន្ថយជម្លោះរឿងដីធ្លីបានមួយកម្រិតផងដែរ ដូច្នេះសូមបងប្អូនប្រជាពលរដ្ឋដែលទទួលបានប្លង់រឹងទាំងនោះ ត្រូវថែរក្សាការពារឱ្យបានល្អ ព្រោះថាវាធានាបាននូវភាពកក់ក្តៅ សុវត្ថិភាព និងសិទ្ធិកាន់កាប់ដីធ្លីពេញលេញ និងចៀសវាងនូវការរំលោភបំពានលើដីធ្លីរបស់ខ្លួន។ ជាមួយគ្នានេះ លោកបានស្នើបងប្អូនប្រជាពលរដ្ឋត្រូវធ្វើការពិចារណាឱ្យបានច្បាស់លាស់ មុននឹងយកប្លង់កម្មសិទ្ធិទៅដាក់បញ្ចាំនៅធនាគារ ដើម្បីខ្ចីប្រាក់មកបង្កើនមុខរបបរបស់ខ្លួន ចៀសវាងមានបញ្ហានៅពេលសងត្រលប់ទៅវិញ។ បើយោងតាម លោក នួន សុធា ប្រធានមន្ទីររៀបចំដែនដីនគរូបនីយកម្មសំណង់ និងសូរិយោដីខេត្តតាកែវ, ប័ណ្ណសម្គាល់ម្ចាស់អចលនវត្ថុចំនួន ១,៨១១ប័ណ្ណ ត្រូវបានប្រគល់ជូនបងប្អូនប្រជាពលរដ្ឋ, ៦០ត្រូវបានប្រគល់ជូនបងប្អូន ប្រជាពលរដ្ឋ ៦០១គ្រួសារ មកពីភូមិតាញឹម, ភូមិតាភិន, ភូមិតាផាន់ និងភូមិព្រៃបាយ ឃុំព្រៃយុថ្កា ស្រុកកោះអណ្ដែត ខេត្តតាកែវ។ សូមជម្រាបថា ប័ណ្ណកម្មសិទ្ធិ គឺជាឯកសារដ៏មានសារៈសំខាន់ ជាឯកសារតំណាងអោយទ្រព្យសម្បត្តិរបស់បងប្អូនប្រជាពលរដ្ឋ ជាឯកសារតំណាងឱ្យកម្មសិទ្ធិផ្ដាច់មុខរបស់បងប្អូន ហើយអាចបញ្ជៀសនូវជម្លោះផ្នែកដីធ្លីបានល្អ៕

ព័ត៌មានទាក់ទង