រហូតមកដល់ពេលនេះ លោក ត្រាំ មិនទាន់ទទួលបានជោគជ័យ ក្នុងការសម្របសម្រួលឱ្យមានកិច្ចព្រមព្រៀងសន្តិភាព ដើម្បីបញ្ចប់សង្គ្រាមនៅអ៊ុយក្រែន ដែលបានចាប់ផ្តើមនៅពេលរុស្ស៊ីឈ្លានពានអ៊ុយក្រែន កាលពីខែកុម្ភៈ ឆ្នាំ២០២២ នៅឡើយទេ។ កាលពីថ្ងៃព្រហស្បតិ៍សប្តាហ៍នេះ រដ្ឋមន្ត្រីការបរទេសអាមេរិក លោក Marco Rubio បាននិយាយថា សង្គ្រាមរុស្ស៊ីនៅអ៊ុយក្រែនកំពុងស្ថិតក្នុងភាពទាល់ច្រកដ៏គ្រោះថ្នាក់ ហើយសហរដ្ឋអាមេរិក នឹងបន្តខិតខំស្វែងរកដំណោះស្រាយ ដើម្បីបញ្ចប់ជម្លោះនេះ។ វិមានក្រឹមឡាំង បាននិយាយថា ប្រធានាធិបតីរុស្ស៊ី លោក វ៉្លាឌីមៀ ពូទីន បានប្រាប់ប្រធានាធិបតីអាមេរិក លោក ដូណាល់ ត្រាំ កាលពីថ្ងៃសុក្រ ទី៩ ខែតុលា ឆ្នាំ២០២៦ ថា ទីក្រុងកៀវបានបំផ្លាញលទ្ធភាពនៃការចាប់ផ្តើមឡើងវិញភ្លាមៗ សម្រាប់កិច្ចចរចាសន្តិភាពត្រីភាគីស្តីពីអ៊ុយក្រែន បន្ទាប់ពីភាគីអ៊ុយក្រែន បានវាយប្រហារទីក្រុងមូស្គូដោយប្រើយន្តហោះដ្រូន អំឡុងការបោះឆ្នោតកាលពីខែមុន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ លោក ពូទីន ធ្លាប់បាននិយាយថា ទីក្រុងមូស្គូបានត្រៀមខ្លួនរួចជាស្រេច ក្នុងការបន្តការចរចាជាមួយទីក្រុងកៀវ ប៉ុន្តែការវាយប្រហាររបស់អ៊ុយក្រែនលើទីក្រុងមូស្គូ និងការិយាល័យបោះឆ្នោត ក្នុងអំឡុងពេលបោះឆ្នោតសភារុស្ស៊ី កាលពីខែកញ្ញា បានធ្វើឱ្យដំណើរការសន្តិភាពស្ថិតក្នុងហានិភ័យ។ លោក Yuri Ushakov ដែលជាទីប្រឹក្សាគោលនយោបាយការបរទេសរបស់វិមានក្រឹមឡាំង បាននិយាយអំពីកិច្ចសន្ទនាតាមទូរស័ព្ទរវាងមេដឹកនាំទាំងពីរ យ៉ាងដូច្នេះថា «តាមរយៈការបើកការវាយប្រហារដោយយន្តហោះដ្រូនក្នុងទ្រង់ទ្រាយធំលើទីក្រុងមូស្គូ ទីក្រុងផ្សេងៗទៀត និងការិយាល័យបោះឆ្នោត ព្រមទាំងលើបុគ្គលមួយចំនួនដែលពាក់ព័ន្ធនឹងការរៀបចំការបោះឆ្នោត នៅថ្ងៃសំខាន់នៃការបោះឆ្នោត របបដឹកនាំទីក្រុងកៀវជាក់ស្តែងបានរារាំង នូវលទ្ធភាពនៃការចាប់ផ្តើមឡើងវិញបានភ្លាមៗ នៃដំណើរការចរចា»។ លោកបានបន្ថែមថា «ហើយឥឡូវនេះ ដូចដែលលោកប្រធានាធិបតី ពូទីន បានលើកឡើង យើងនឹងពិចារណាថា តើអាចបន្តការចរចាឡើងវិញនៅពេលណា» ដោយលោកសំដៅលើការចរចាត្រីភាគី ដែលមានសហរដ្ឋអាមេរិក រុស្ស៊ី និងអ៊ុយក្រែនចូលរួម។ លោក Ushakov ក៏បាននិយាយដែរថា លោក ពូទីន និងលោក ត្រាំ បានពិភាក្សាអំពីគំនិតផ្តួចផ្តើមសេដ្ឋកិច្ចសំខាន់ៗ អំឡុងកិច្ចសន្ទនាទូរស័ព្ទខាងលើ ក្នុងនោះរួមមានទាំងលទ្ធភាពផ្គត់ផ្គង់ប្រេងឥន្ធនៈរបស់រុស្ស៊ី។ គួរបញ្ជាក់ថា កាលពីថ្ងៃសុក្រ បន្ទាប់ពីការសន្ទនាតាមទូរស័ព្ទជាមួយលោក ពូទីន លោក ដូណាល់ ត្រាំ បានប្រកាសថា រុស្ស៊ីបានយល់ព្រមផ្គត់ផ្គង់ប្រេងម៉ាស៊ូតរាប់លានតោនជាបន្ទាន់ ទៅកាន់ទីផ្សារអាមេរិក និងទីផ្សារពិភពលោក ដើម្បីបញ្ចុះតម្លៃប្រេងឥន្ធនៈ មុនការបោះឆ្នោតសភាពាក់កណ្តាលអាណត្តិរបស់សហរដ្ឋអាមេរិក នៅខែក្រោយ។ ទោះជាយ៉ាងណា ក្រុមអ្នកវិភាគយល់ឃើញថា បរិមាណប្រេងដែលត្រូវផ្គត់ផ្គង់ ទំនងជាមិនអាចធ្វើឱ្យតម្លៃធ្លាក់ចុះវិញច្រើននោះទេ៕

ព័ត៌មានទាក់ទង