ការវាយប្រហារនេះ បានធ្វើឱ្យខូចខាតយន្តហោះមួយគ្រឿងរបស់ក្រុមហ៊ុនអាកាសចរណ៍ Saudia Airlines និងបង្កជាផ្សែងហុយខ្មួលខ្មាញ់ពេញព្រលាន រហូតធ្វើឱ្យក្រុមហ៊ុនអាកាសចរណ៍ជាច្រើនសម្រេចលុបចោលជើងហោះហើរទៅកាន់រដ្ឋធានីរីយ៉ាដ មុនពេលអារ៉ាប៊ីសាអូឌីតធ្វើជាម្ចាស់ផ្ទះនៃកិច្ចប្រជុំកំពូលមេដឹកនាំប្រេងពិភពលោក។ ក្រុមហ៊ុន Saudia Airlines បានបញ្ជាក់ថា ជនរងគ្រោះម្នាក់ក្នុងចំណោមអ្នកស្លាប់ គឺជាបុគ្គលិករបស់ខ្លួន។ អាជ្ញាធរអារ៉ាប៊ីសាអូឌីត បានឱ្យដឹងនៅថ្ងៃសុក្រនេះថា ការវាយប្រហាររបស់ក្រុមហ៊ូទី (Houthi) លើព្រលានយន្តហោះរដ្ឋធានីរីយ៉ាដ កាលពីថ្ងៃព្រហស្បតិ៍ បានសម្លាប់មនុស្ស ៣ នាក់ និងរបួសជាច្រើននាក់ ខណៈក្រុមប្រដាប់អាវុធនេះបានបង្កើនការបាញ់មីស៊ីលដើម្បីបិទដែនអាកាសអារ៉ាប៊ីសាអូឌីត។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៩ ខែតុលា ឆ្នាំ២០២៦។ ជាការឆ្លើយតប យោធាអារ៉ាប៊ីសាអូឌីតបានបើកការវាយប្រហារតាមអាកាសសងសឹកលើគោលដៅក្រុមហ៊ូទី ក្នុងរដ្ឋធានីសាណា (Sanaa) កាលពីយប់មិញ។ សម្ព័ន្ធភាពយោធាដឹកនាំដោយអារ៉ាប៊ីសាអូឌីត បានអះអាងថា ខ្លួនបានកម្ទេចទម្របាញ់មីស៊ីលរបស់ក្រុមហ៊ូទីចំនួន ៣ កន្លែង ព្រមទាំងព្រមានចាត់វិធានការឆ្លើយតបយ៉ាងចាស់ដៃចំពោះការវាយប្រហារលើជនស៊ីវិល។ ទោះជាយ៉ាងណា អាជ្ញាធរអាកាសចរស៊ីវិលអារ៉ាប៊ីសាអូឌីត បញ្ជាក់ថា ចរាចរណ៍ផ្លូវអាកាសនៅព្រលានយន្តហោះរីយ៉ាដ បានវិលមករកប្រក្រតីភាពវិញហើយ ខណៈជើងហោះហើរមួយចំនួនបានចាប់ផ្តើមដំណើរការឡើងវិញជាបណ្តើរៗ។ គួរបញ្ជាក់ថា ជម្លោះនេះកំពុងរីករាលដាលកាន់តែខ្លាំង ខណៈក្រុមហ៊ូទីកំពុងឡោមព័ទ្ធកងទ័ពរដ្ឋាភិបាលយេម៉ែនក្នុងទីក្រុងតាអ៊ីស (Taiz) និងព្យាយាមការពារទីតាំងឈរជើងរបស់ខ្លួននៅតាមបណ្តោយឆ្នេរសមុទ្រក្រហម៕

ព័ត៌មានទាក់ទង