ខេត្តកំពត៖ថ្លែងក្នុងឱកាសនេះដែរ លោកអភិបាលរងបានជម្រាបជូនអង្គពិធីពីសក្តានុពលទេសចរណ៍ និងវិនិយោគរបស់ខេត្តកំពតជាច្រើន ជាពិសេសសមិទ្ធិផលដែលសម្រេចបានដោយរដ្ឋបាលខេត្ត គឺកំពតជាទីក្រុងជ័យលាភីផ្ការំដួល៣ទងថ្នាក់ជាតិជាបន្តបន្ទាប់ ជ័យលាភីទីក្រុងទេសចរណ៍ស្អាតអាស៊ាន២លើកជាបន្តបន្ទាប់ និងពានរង្វាន់ជ័យលាភីជាច្រើន សណ្ឋាគារបៃតង ផ្ទះស្នាក់សហគមន៍។ល។ ក្នុងឆ្នាំ២០២៥ កន្លងមកនេះ ខេត្តកំពត ទទួលបានទេសចរសរុបចំនួនជិត ២,៩លាននាក់ មានការកើនឡើងជិត៦% បើប្រៀបធៀបនឹងឆ្នាំ២០២៤ ចំពោះ ទេសចរបរទេសមានការកើនឡើងជិត២០%។ តបតាមការអញ្ជើញរបស់អ្នករៀបចំកម្មវិធីលោក ហួត ហាក់ រដ្ឋមន្រ្តីក្រសួងទេសចរណ៍ នៅថ្ងៃទី១១ ខែមីនា ឆ្នាំ២០២៦ បានអញ្ជើញជាគណៈអធិបតីក្នុងពិធីបើកវគ្គបណ្ដុះបណ្ដាលគ្រូបង្គោលស្ដីពី «សេវាឧត្ដមភាពការអភិវឌ្ឍជំនាញ និងនវានុវត្តន៍ទេសចរណ៍សម្រាប់បណ្ដាប្រទេសមេគង្គ ឡាងឆាង» ដោយមានការចូលរួមពីសំណាក់លោក ខៀវ រិទ្ធិភ័ណ្ឌ អភិបាលរងខេត្តកំពត និងភ្ញៀវជាតិ និងអន្តរជាតិមកពីបណ្តាប្រទេសចិន ឡាវ មីយ៉ាន់ម៉ា វៀតណាម និងកម្ពុជា ព្រមទាំងអ្នកជំនាញទេសចរណ៍ល្បីៗ សាស្រ្តាចារ្យ និងអ្នកប្រកបវិជ្ជាជីវៈសរុបច្រើនជាង២០០នាក់។ ក្នុងឱកាសនៃវគ្គបណ្ដុះបណ្ដាលជាលក្ខណៈអន្តរជាតិ និងមានសារៈសំខាន់នេះ គណៈអធិបតី បានកោតសរសើរ និងវាយតម្លៃខ្ពស់ចំពោះពិធីវគ្គបណ្ដុះបណ្ដាលដែលមិនត្រឹមតែជាការចូលរួមចំណែកក្នុងការអភិវឌ្ឍវិស័យទេសចរណ៍ដែលជាវិស័យដ៏សំខាន់មួយក្នុងសេដ្ឋកិច្ច និងការរិះរកគំនិតផែនការបង្កើនសន្ទុះការងើបរើឡើងវិញរបស់វិស័យនេះតាមការចូលរួមរបស់យុវជនពីបណ្តាប្រទេសជាសមាជិក។ វគ្គបណ្ដុះបណ្ដាលអន្តរជាតិនេះ នឹងវេទិការឹតបន្តឹង និងពូនជ្រំទំនាក់ទំនងមិត្តភាព កិច្ចសហការ និងការផ្លាស់ប្តូរប្រជាជន និងប្រជាជនរវាងបណ្តាប្រទេសក្នុងអាងទន្លេមេគង្គ ដែលគម្រោងនេះត្រូវបានឧបត្តម្ភគាំទ្រទាំងស្រុងដោយភាគីមិត្តចិន។ រដ្ឋមន្រ្តី ហួត ហាក់ បានថ្លែងថាវគ្គបណ្ដុះបណ្ដាលប្រកបដោយគុណភាព នឹងបន្ថែមអត្ថន័យឱ្យកាន់តែស៊ីជម្រៅដល់កិច្ចសហប្រតិបត្តិរវាងប្រទេសក្នុងតំបន់អាងទន្លេមេគង្គ ព្រមទាំងចំណងមិត្តភាពកម្ពុជា-ចិន និងទំនាក់ទំនងការទូតដ៏យូរលង់អស់រយៈពេល៦៧ឆ្នាំ ស្របតាមស្មារតី «មិត្តដែកថែប និងសហគមន៍វាសនារួម កម្ពុជា-ចិនគ្រប់រដូវ ប្រកបដោយភាពស៊ីជម្រៅ និងភាពជាក់ស្ដែង ក្នុងយុគសម័យថ្មី» ក៏ដូចជាក្របខណ្ឌកិច្ចសហប្រតិបត្តិការត្បូងពេជ្ររវាងកម្ពុជា-ចិន។ និយាយដោយឡែក គឺការផ្តល់ឱកាសរួមគ្នាជាពិសេសយុវជនបន្តវេនពីប្រទេសសមាជិក ក្នុងការចូលរួមគ្នាគិត និងរួមគ្នាធ្វើ ដើម្បីអភិវឌ្ឍទេសចរណ៍ តាមរយៈការទាញយកពីបច្ចេកវិទ្យា និងគំនិតច្នៃប្រឌិតថ្មី ដើម្បីជម្រុញការងើបឡើងវិញនូវវិស័យទេសចរណ៍ បន្ទាប់ពីត្រូវជួបផលវិបាកយ៉ាងខ្លាំងពីវិបត្តិជម្ងឺកូវីដ១៩ កន្លងទៅ។ វគ្គបណ្ដុះបណ្ដាលនេះ នឹងផ្តល់ឱកាសដល់ប្រតិភូជាអ្នកប្រកបវិជ្ជាជីវៈ ឬ ក៏សហគ្រិនភ្ជាប់ទំនាក់ទំនងគ្នា ធ្វើការរួមគ្នា សហការចាប់ឱកាសបង្កើតអាជីវកម្មទេសចរណ៍រួមគ្នាផងដែរ ដើម្បីជំរុញសន្ទុះងើបឡើងវិញនៃការវិនិយោគក្នុងវិស័យទេសចរណ៍ និងកំណើនភ្ញៀវទេសចរជាតិ ចិន និងអន្តរជាតិមកលេងតំបន់អាងទន្លេមេគង្គនេះ៕

ព័ត៌មានទាក់ទង