ផ្ទុយពីវិធីសាស្ត្ររបស់លោក Elon Musk ដែលផ្ដោតខ្លាំងលើការវះកាត់បង្កប់បន្ទះឈីប (Invasive) ចូលក្នុងខួរក្បាលមនុស្ស ពោលគឺឧស្សាហកម្ម BCI របស់ចិនកំពុងដើរលើផ្លូវពីរស្របគ្នា ទី១ គឺបច្ចេកវិទ្យាវះកាត់បង្កប់ វិធីនេះកំពុងមានវឌ្ឍនភាពលឿនក្នុងការជួយអ្នកជំងឺខ្វិនឱ្យមានចលនាឡើងវិញ។ ទី២ បច្ចេកវិទ្យាមិនបាច់វះកាត់ (Non-invasive) ដោយចិនកំពុងនាំមុខក្នុងការបង្កើតឧបករណ៍ពាក់លើក្បាល ដែលអាចប្រើប្រាស់បានក្នុងវិស័យអប់រំ យោធា និងការថែទាំសុខភាពទូទៅ។ មូលហេតុចម្បងដែលធ្វើឱ្យចិន ការអភិវឌ្ឍន៍បច្ចេកវិទ្យានេះបានយ៉ាងលឿនរហ័ស ក្នុងសមរភូមិបច្ចេកវិទ្យានេះ គឺដោយសារការដាក់បញ្ចូល BCI ទៅក្នុង «ឧស្សាហកម្មនាពេលអនាគត» ដែលមានអាទិភាពខ្ពស់បំផុត។ រដ្ឋាភិបាលក្រុងប៉េកាំងបានផ្ដល់ទាំងថវិកា មន្ទីរពិសោធន៍ថ្នាក់ជាតិ និងការសម្របសម្រួលផ្នែកច្បាប់ ដើម្បីរុញច្រានឱ្យផលិតផលទាំងនេះចេញលក់លើទីផ្សារឱ្យបានឆាប់រហ័ស។ ស្របពេលពិភពលោកកំពុងផ្ដោតការចាប់អារម្មណ៍ខ្លាំងលើក្រុមហ៊ុន Neuralink របស់មហាសេដ្ឋី Elon Musk ក្នុងនាមជាអ្នកត្រួសត្រាយផ្លូវនៃបច្ចេកវិទ្យាតភ្ជាប់ខួរក្បាលជាមួយកុំព្យូទ័រ (BCI) ងាកមកប្រទេសចិនឯណោះវិញ ក៏កំពុងតែបង្កើនល្បឿនយ៉ាងលឿននិងស្ងៀមស្ងាត់ ក្នុងការប្រែក្លាយបច្ចេកវិទ្យាពីមន្ទីរពិសោធន៍ឱ្យទៅជាឧស្សាហកម្មខ្នាតធំ ដែលអាចផ្លាស់ប្តូរមុខមាត់វិស័យវេជ្ជសាស្ត្រ និងបច្ចេកវិទ្យាពិភពលោក។ នេះបើយោងតាមការចេញផ្សាយដោយគេហទំព័រព័ត៌មាន Tech Crunch នៅថ្ងៃទី២៣ ខែកុម្ភៈ ឆ្នាំ២០២៦។ បច្ចុប្បន្ន ក្រុមហ៊ុនចិនជាច្រើនកំពុងបង្ហាញសមត្ថភាពមិនចាញ់ Neuralink ឡើយ ជាពិសេសក្នុងការកាត់បន្ថយភាពយឺតយ៉ាវនៃសញ្ញា (Latency) និងការបង្កើនភាពត្រឹមត្រូវនៃការបញ្ជាដោយខួរក្បាល។ អ្នកជំនាញយល់ថា ប្រសិនបើនិន្នាការនេះនៅតែបន្ត ចិនអាចនឹងក្លាយជាអ្នកកំណត់ «ស្តង់ដារ» សម្រាប់បច្ចេកវិទ្យា BCI ពិភពលោកក្នុងពេលដ៏ខ្លីខាងមុខ។ គួរជម្រាបថា បច្ចេកវិទ្យា BCI នៅដើមឆ្នាំ២០២៦ នេះ គឺបានបង្ហាញថាការប្រកួតប្រជែងរវាងសហរដ្ឋអាមេរិក និងចិន មិនមែនមានតែលើវិស័យ AI ឬ បន្ទះឈីបកុំព្យូទ័រប៉ុណ្ណោះទេ ប៉ុន្តែថែមទាំងលើ «សមរភូមិខួរក្បាល» ទៀតផង៕

ព័ត៌មានទាក់ទង